მას შემდეგ, რაც დონალდ ტრამპის პირველმა ცოლმა, ივანა ტრამპმა, თავისი წიგნის პრეზენტაციაზე "იხუმრა", რომ ის იყო აშშ-ს ნამდვილი პირველი ლედი, მელანია ტრამპის პრესსამსახურმა განაცხადა, რომ ივანა უბრალოდ ყურადღების მიქცევას ცდილობს.

ივანამ ასევე თქვა, რომ ის თავის ყოფილ ქმარს ყოველ 14 დღეში ერთხელ ელაპარაკება და რჩევებს აძლევს, თუმცა "თეთრ სახლში უფრო ხშირად არ რეკავს, რადგან მელანია იქ ცხოვრობს და არ სურს, რომ რამე სახის ეჭვიანობა გამოიწვიოს".

ამის შემდეგ ივანამ სიცილით დასძინა:

"მე დონალდ ტრამპის პირველი ცოლი ვარ, ასე რომ პირველი ლედი გამოვდივარ, ხომ ასეა?"

აშშ-ს პირველი ლედის, მელანია ტრამპის პრესსამსახურის უფროსი სტეფანი გრიშამი ივანას სიტყვებს გამოეხმაურა და მათ უშინაარსო უწოდა:

"მელანიამ თეთრ სახლში ბარონისთვის და დონალდისთვის შინაურული გარემო შექმნა. მას უყვარს ვაშინგტონში ცხოვრება და მადლიერია, რომ ამერიკის შეერთებული შტატების პირველი ლედი გახდა. მას თავისი ტიტულით ბავშვების დახმარება სურს და არა წიგნების გაყიდვა. აშკარაა, რომ [ტრამპის] ყოფილი ცოლის განცხადებები უშინაარსოა და ეს მხოლოდ ყურადღების მისაქცევად და პირადი ინტერესებისთვის ხდება".

ივანა ტრამპი დონალდ ტრამპის ცოლი 1977-1992 წლებში იყო. ის დონალდ ტრამპ უმცროსის, ივანკას და ერიკის დედაა და ახალ წიგნში აშშ-ს მომავალ პრეზიდენტთან ქორწინებაზე წერს.

თავის წიგნში ივანა ასევე წერს, რომ ერთ დღეს შესაძლოა ივანკამ ამერიკის საპრეზიდენტო არჩევნებში მიიღოს მონაწილეობა, ხოლო ხმაურიანი განქორწინების მიუხედავად, თავად მას აშშ-ს პრეზიდენტთან თბილი ურთიერთობა აქვს.

თუმცა 2016 წლის არჩევნებამდე ცნობილი გახდა, რომ ივანა დონალდს გაუპატიურების ბრალდებით უჩიოდა, თუმცა ტრამპი ამას უარყოფდა. ტრამპის იმდროინდელმა ადვოკატმა ჟურნალისტებთან განაცხადა, რომ ქორწინების დროს გაუპატიურება არ არსებობს.