დღეს, 10 ოქტომბერს, თბილისის საკრებულო ბიძინა ივანიშვილთან დაკავშირებული კომპანიისთვის იმ ტერიტორიების პირდაპირი წესით გადაცემას განიხილავს, რომლებსაც ფუნქციური ზონის სტატუსი უკვე შეეცვალათ.

ოქროყანის დასახლებაში მდებარე 4 400 კვ.მ. მიწის ნაკვეთისა და პუშკინის ქუჩაზე, "ცეკავშირის" მიმდებარე ტერიტორიაზე არსებული 1 900 კვ.მ. მიწის ნაკვეთის პირდაპირი განკარგვის ფორმით პრივატიზების საკითხები საკრებულოს დღის წესრიგშიც გათვალისწინებულია.

29 სექტემბერს თბილისის საკრებულომ პანორამა თბილისისთვის პუშკინის სკვერთან 1 900 კვ.მ-ის ფართობის მიწის ნაკვეთის სტატუსის შეცვლას მხარი დაუჭირა. პუშკინის სკვერთან, პანორამა თბილისის სასტუმროს მიმდებარედ მიწისქვეშა ავტოსადგომის აშენება იგეგმება. ასევე, სოლოლაკის ქედზე ტერიტორიას ლანდშაფტური ზონის სტატუსი შეეცვალა. არსებული ინფორმაციით, თაბორის მთის ტერიტორია პანორამას თბილისის გოლფის მოედანს უნდა შეუერთდეს.

სხდომის დაწყებამდე დარბაზში თბილისის მერობის კანდიდატები ევროპული საქართველოდან - ელენე ხოშტარია და ნაციონალური მოძრაობიდან - ზაალ უდუმაშვილი მივიდნენ. საკრებულოს დაცვის თანამშრომლებმა მერობის კანდიდატები და პარტიზანი მებაღე ნატა ფერაძე დარბაზიდან ძალის გამოყენებით გაიყვანეს. საკრებულოს წევრმა, ალეკო ელისაშვილმა სხდომათა დარბაზი პროტესტის ნიშნად დატოვა. მოგვიანებით, მან განაცხადა, რომ თბილისის საკრებულოს ტოვებს.