ბრიუსელში გაფართოების ფორუმი გაიხსნა, სადაც საქართველო მიწვეული არ არის. ამის მიზეზი, მათი თქმით, ის გახადა, რომ ქართული ოცნება უფრო და უფრო შორდება ევროკავშირის გზას.

"ევროსკოპის" ცნობით, გაფართოების ფორუმის პირველ პანელში მონაწილეობას იღებენ ევროკომისრები: კაია კალასი, მარტა კოსი და ანდრიუს კუბილიუსი, ასევე უკრაინის, მოლდოვას და მონტენეგროს წარმომადგენლები. ევროკომისიამ ეს ქვეყნები ევროინტეგრაციის გზაზე წარმატებულ ქვეყნებად დაასახელა.

სიტყვით გამოსვლისას გაფართოების საკითხებში ევროკომისარმა მარტა კოსმა აღნიშნა რომ, ორგანიზაციამ ახალი სტრატეგია "დემოკრატიის ფარი" წარადგინა, რომელშიც კანდიდატი ქვეყნები იქნებიან ჩართული.

თავდაცვის საკითხებში ევროკომისარმა, ანდრიუს კუბილიუსმა ევროკავშირის გაფართოების ფორუმზე განაცხადა, რომ "საქართველოს შეუძლია, დაუბრუნდეს გაფართოების პროცესს, რა თქმა უნდა, თუ საქართველოში მოხდება ცვლილებები".

"საკმაოდ დიდი ხნის განმავლობაში ოლიგარქები ან კიდევ რა შეიძლება, ვუწოდოთ მათ, საქართველოში და ზოგიერთ სხვა ქვეყანაში აკეთებდნენ გზავნილებს, რომ დაივიწყეთ გაფართოების შესახებ, რადგან ეს საერთოდ არ მოხდება. ახლა ჩვენ შეგვიძლია, ძალიან მკაფიო არგუმენტი, მტკიცებულება მოვიყვანოთ, რომ გაფართოება მოხდება და საქართველოს შეუძლია, დაუბრუნდეს გაფართოების პროცესს, რა თქმა უნდა, თუ საქართველოში მოხდება ცვლილებები", — განაცხადა კუბილიუსმა.

გაფართოების ფორუმის პანელურ დისკუსიაზე საქართველოს შესახებ დასმული შეკითხვის პასუხად გაფართოების საკითხებში ევროკომისარმა მარტა კოსმა განაცხადა, რომ საქართველოში სამოქალაქო საზოგადოების მხარდაჭერა რთულია, რადგან მთავრობა ძალიან ყურადღებით აკვირდება, თუ ვის მივცემთ ფულს.

"საქართველოში სამოქალაქო საზოგადოების მხარდაჭერას რაც შეეხება, მიუხედავად იმისა, რომ ახლა ეს რთულია, რადგან მთავრობა ძალიან ყურადღებით აკვირდება, თუ ვის მივცემთ ფულს, ფინანსური დახმარება გაორმაგდა და იქნება კიდევ უფრო მეტი. ჩვენ ახლა ვეძებთ გზებს, თუ როგორ გადავცეთ მათ ფული ისე, რომ არ დავაზარალოთ ისინი. მაგალითად, გასულ კვირას მქონდა დიალოგი კანდიდატი ქვეყნების სამოქალაქო საზოგადოების წარმომადგენლებთან, სადაც საქართველოს წარმომადგენელიც იმყოფებოდა", – განაცხადა კოსმა (ციტატას "პირველი არხი" ავრცელებს).

ევროკომისარმა აღნიშნა, რომ 2025 წელი კარგი იყო გაფართოების მიმართულებით: "მნიშვნელოვანი წინსვლა მოხდა ევროკავშირისკენ მიმავალ გზაზე მონტენეგროს, ალბანეთის, მოლდოვისა და უკრაინის მხრიდან. ეს აჩვენებს, რომ რეფორმები იძლევა შედეგს", — თქმა მარტა კოსმა.

მისი თქმით, ქვეყნებმა წინსვლისთვის სამ მიმართულებაზე უნდა იმუშაონ.

"პირველი, ნებისმიერი პროგრესი, რომელსაც ვაღწევთ მომავალ წევრ სახელმწიფოებთან, უნდა იყოს სანდო. კანდიდატებმა სრულად უნდა შეასრულონ ძირითადი მოთხოვნები და ისინი ეფექტურად განახორციელონ. მოკლე გზები არ არსებობს და არც იქნება. ხშირად მეკითხებიან, ნიშნავს თუ არა გეოპოლიტიკური არგუმენტები, რომ უნდა დავხუჭოთ თვალი და მივიღოთ ახალი წევრები ნებისმიერ ფასად? არა, ეს პირიქითაა. დემოკრატიული ინსტიტუტები როდესაც სუსტია ან კანონის უზენაესობა გაუმართავია, ეს კარს უხსნის მტრულ ზემოქმედებას, კორუფციასა და ორგანიზებულ დანაშაულს. ჩვენი კავშირი აგებულია წევრებს შორის ნდობაზე. წარმატებული გაფართოება შეიძლება მოხდეს მხოლოდ მაშინ, როდესაც არსებობს ნდობა, რომელიც დაფუძნებულია მიღწევებზე, დამსახურებებზე; მეორე, ევროკავშირი უნდა მოემზადოს ახალი წევრებისთვის. ჩვენ ამჟამად ვმუშაობთ გაწევრიანებამდე მზადყოფნის შეფასებაზე. ჩვენ უნდა ვიცოდეთ, რა იქნება მომავალი გაფართოების გავლენა ძირითად პოლიტიკურ სფეროებზე, ჩვენს ბიუჯეტსა და მართვის სტრუქტურებზე. უნდა უზრუნველვყოთ მკაფიო პასუხები ჩვენი მოქალაქეების შეშფოთებებსა და წუხილებზე – რას ნიშნავს გაფართოება ჩვენი სოციალური დაცვის მოდელისთვის, როგორ გააძლიერებს ის ჩვენი საზღვრების კონტროლს, როგორ უზრუნველვყოფთ კანონის უზენაესობის პატივისცემას გაწევრიანების შემდეგ და როგორ იმუშავებს კავშირი ეფექტურად. ჩვენ უნდა გვქონდეს ღია დისკუსია იმის შესახებ, თუ რა სახის უსაფრთხოების გარანტიებს ჩავწერთ მომავალ გაწევრიანების ხელშეკრულებებში, რათა დავარწმუნოთ ჩვენი მოქალაქეები, რომ ჩვენი კავშირის მთლიანობა დაცულია; მესამე, დროა, გავაფართოოთ თავად გაფართოება. კანდიდატ ქვეყნებს სჭირდებათ დრო რეფორმებისთვის და ზოგჯერ ჩვენს წევრ სახელმწიფოებს სჭირდებათ დრო გადაწყვეტილების მისაღებად, დრო, რომელსაც დღევანდელი სამყარო აღარ გვაძლევს. სწრაფად და მტკიცედ თუ არ ვიმოქმედებთ, რისკია, დავკარგოთ კონტროლი უსაფრთხოებასა და სტაბილურობაზე ჩვენსავე კონტინენტზე", — აღნიშნა მარტა კოსმა (კომენტარს "პირველი არხი" ავრცელებს).

ბრიუსელში ევროკავშირის გაფართოების ფორუმი დღეს გაიხსნა. მისი სლოგანია "კავშირის სრულყოფა და ჩვენი მომავლის უზრუნველყოფა" და აერთიანებს ფართო და მრავალფეროვან მონაწილეთა წრეს.