ოცნების პარლამენტის საგარეო ურთიერთობათა კომიტეტის თავმჯდომარის, ნიკოლოზ სამხარაძის თქმით, "ის ფაქტი, რომ საქართველო არაა მიწვეული EU-ს გაფართოების სამიტზე იმ პოლიტიკის გაგრძელებაა, რომელიც ბრიუსელს აქვს ­— "რომ არ ჰქონდეს დიალოგი საქართველოს მთავრობასთან".

"ის ფაქტი, რომ საქართველო არ არის მიწვეული EU-ს გაფართოების სამიტზე, არის იმ პოლიტიკის გაგრძელება, რომელიც ბრიუსელს აქვს. მათ შორის გაგახსენებთ, რომ საქართველო მიწვეული არ იყო შავი ზღვის დაკავშირებადობის სამიტზე, რომლის მთავარი თემაც იყო ევროპის დაკავშირება კავკასიის გავლით ცენტრალურ აზიასთან. როდესაც საქართველოს ასეთ ღონისძიებაზე არ მიიწვევ გაუგებარია, რა გზებით აპირებენ ცენტრალურ აზიასთან დაკავშირებას კავკასიის გავლით თუ არა საქართველოს გავლით. ამიტომ ნათელია, რომ ეს არის პოლიტიკა, რომელიც ბრიუსელს აქვს, რომ არ ჰქონდეს დიალოგი საქართველოს მთავრობასთან. მე მიმაჩნია, რომ ეს არის ძალიან წამგებიანი, გაუაზრებელი და არალოგიკური პოლიტიკა ბრიუსელის მხრიდან, თუმცა ასევე ვიმედოვნებ, რომ ეს პოლიტიკა, მალე შეიცვლება, იმიტომ რომ თუ მათ მართლაც აქვთ გულწრფელი ინტერესი, რომ საქართველო და ქართველი ხალხი იხილონ ევროპულ ოჯახში მაშინ ისინი უნდა ელაპარაკონ იმ ხელისუფლებას, რომელიც აირჩია ქართველმა ხალხმა," — განაცხადა სამხარაძემ.

ცნობისათვის, ქართული ოცნების მთავრობა ევროკავშირის გაფართოების პირველ ფორუმზე, რომელიც ევროკომისიის ორგანიზებით, 18 ნოემბერს ბრიუსელში იმართება, მიწვეული არ არის.

ევროპის კომისიის პირველი "გაფართოების ფორუმი" 2025 წლის 18 ნოემბერს ბრიუსელში გაიმართება. ღონისძიებას ევროკომისარი გაფართოების საკითხებში, მარტა კოსი უმასპინძლებს. ფორუმი სლოგანით "კავშირის სრულყოფა და ჩვენი მომავლის უზრუნველყოფა" გაიმართება და გააერთიანებს ფართო და მრავალფეროვან მონაწილეთა წრეს.

შეგახსენებთ, რომ 4 ნოემბერს ევროკომისიამ გაფართოების ანგარიში გამოაქვეყნა, სადაც ნათქვამია, რომ "საქართველოს ხელისუფლების ქმედებებმა შეარყია ევროკავშირ-საქართველოს ურთიერთობები და საქართველო ჩამოაშორა ევროკავშირის გაფართოების პროცესს. შესაბამისად, საქართველოს ევროკავშირში გაწევრიანების პროცესი ფაქტობრივად ჩიხშია შესული.