ბრიტანული კინოსა და ტელევიზიის აკადემია საკუთარი რიგების ზრდას განაგრძობს და უკვე შემდეგი წლიდან ერთ-ერთ ყველაზე პრესტიჟულ ჯილდოს სერიალებისთვისაც გასცემს.

შეიძლება ითქვას, რომ ეს უპრენცენდენტო გადაწყვეტილებაა, რადგან აქამდე მსგავსი რანგის დაჯილდოების ცერემონიაზე (თუ არ ჩავთვლით ოქროს გლობუსს) ტელევიზიისთვის პრიზი არ გაცემულა.

"ინდუსტრია ნელ-ნელა იზრდება. ტელევიზიაც შეიცვალა, ის რაც 10-15 და 20 წლის წინ არარეალური იყო, ახლა ჩვენს თვალწინ ხდება. ყოველ წელს ვხედავთ, რომ ტელევიზია ერთმანეთზე უკეთეს შოუებს იღებს და ჩვენც, გამომდინარე იქიდან, რომ კინოს გარდა ტელევიზიის აკადემიაც ვართ, თავს ვალდებულად ვთვლით იმ ხალხს, ვინც ტელევიზიაში მუშაობს პატივი მივაგოთ. ჯერ საბოლოოდ გადაწყვეტილი არ არის ეს იქნება ცალკე კატეგორია BAFTA-ზე თუ პერსონალური დაჯილდოება მათთვის, მაგრამ უკვე ცხადია, რომ ამ ცვლილების დრო მოვიდა. ბრიტანული ტელევიზია, ამერიკულ ტელევიზიასთან ერთად უფრო და უფრო სანახაობრივი და საინტერესო ხდება", - ამბობს აკადემიის პრეზიდენტი ემა ბიარი.

აღსანიშნავია, რომ ტელევიზიისათვის აქამდე ორი პრესტიჟული ჯილდო - ოქროს გლობუსი და ემი არსებობდა, ახლა კი მათ რიცხვს მესამეც შეემატება.

ყველაზე მთავარი ამ ამბავში კი არის ის, რომ შესაძლოა ამ ცვლილებამ გავლენა ოსკარზეც მოახდინოს.

გამომდინარე იქიდან, რომ ამერიკისა და ბრიტანეთის კინოკადემიას ერთმანეთთან მჭიდრო ურთიერთობა აქვთ, ჟურნალისტები და კრიტიკოსები ვარაუდობენ, რომ AMPAS დიდი ალბათობით იგივე გადაწყვეტილებას მალე მიიღებს და ოსკარზე რამდენიმე კატეგორიას ტელევიზიისთვისაც დაამატებს.