CRRC საქართველოს მეირ ჩატარებული კვლევის თანახმად, კითხვაზე, "არის თუ არა ამჟამად საქართველო ევროკავშირის წევრი"? 2017 წელს, გამოკითხული მოსახლეობის 16 პროცენტი პასუხობს დადებითად.

კვლევის ავტორები განმარტავენ, რომ 2009 წლიდან 2015 წლამდე ამ კითხვაზე არასწორი პასუხების წილი სტაბილურად იკლებდა და 2015 წელს გამოკითხულთა მხოლოდ 5 პროცენტი მიიჩნევდა, რომ საქართველო ევროკავშირის წევრია:

"საქართველოს მოქალაქეების გარკვეულმა ნაწილმა, შესაძლოა, ვიზალიბერალიზაცია ევროკავშირში გაწევრიანებასთან გააიგივა ან დაუკავშირა".

კვლევის თანახმად, თუ 2015 წლის გამოკითხვის შედეგების თანახმად, საქართველოს მოსახლეობის დაახლოებით ორმა მესამედმა იცოდა, რომ რუსეთი არ იყო ევროკავშირის წევრი, 2017 წელს ეს ცოდნა საგრძნობლად გამყარებულია და გამოკითხულთა 77% პასუხობს, რომ რუსეთი არ არის ევროკავშირის წევრი.

ევროპის ფონდის დაკვეთით, CRRC-ის მიერ ჩატარებული გამოკითხვის საფუძველზე მომზადებულ ანგარიშში შეფასებულია ევროკავშირის მიმართ საზოგადოების ცოდნა და დამოკიდებულება.

2009, 2011, 2013, 2015 და 2017 წლების კვლევების შედეგების შედარების საფუძველზე, ანგარიშში ასევე შეფასებულია, თუ როგორ იცვლებოდა მოსახლეობის შეფასებები, მოლოდინები და იმედები ევროპასთან ინტეგრაციის კუთხით. 2017 წელს გამოიკითხა 2 258 რესპონდენტი ოთხ სტრატაში.