სასამართლომ დააკმაყოფილა პროკურატურის შუამდგომლობა და ე.წ ჩორჩანას ეპიზოდზე ყოფილ პრემიერმინისტრს, გიორგი გახარიას პატიმრობა დაუსწრებლად შეუფარდა.

პროკურატურის განმარტებით, საშიშროებაა ახალი დანაშაულის ჩადენის, მოწმეებზე ზემოქმედების და მიმალვის. გადაწყვეტილება მოსამართლე დავით კურტანიძემ მიიღო.

გიორგი გახარია სასამართლო სხდომას არ დასწრებია. ის საქართველო მიმდინარე წლის ივნისში დატოვა.

გუშინ, 12 ნოემბერს ცნობილი გახდა, რომ პროკურატურამ გიორგი გახარიას მიმართ 20-21 ივნისის საქმეზე და ჩორჩანას ეპიზოდზე სისხლის სამართლის დევნა დაიწყო.

გენერალურმა პროკურორმა, გიორგი გვარაკიძემ ბრიფინგზე განაცხადა, რომ გახარიასთვის წაყენებული ბრალდებები 13 წლამდე პატიმრობას ითვალისწინებს.

შეგახსენებთ, რომ მიმდინარე წლის 14 ივნისს ცნობილი გახდა, რომ პროკურატურამ დაიწყო გამოძიება, რომელიც "2019 წლის 24 აგვისტოს სოფელ ჩორჩანასთან საოკუპაციო ხაზის გასწვრივ შინაგან საქმეთა ყოფილი მინისტრის, გიორგი გახარიას მიერ განხორციელებული ქმედებას ეხება".

პირველად ე.წ. წულუკიანის კომისიაზე გიორგი გახარია 14 აპრილს გამოჰკითხეს. ე.წ. ჩორჩანას ეპიზოდთან დაკავშირებით განმეორებით გამოსაკითხად ის 23 ივნისს დაიბარეს, მაგრამ საქართველოში არ ყოფნის გამო კომისიას ონლაინ-ჩართვა შესთავაზა, რაზეც წულუკიანის კომისიამ თავიდან უარი განაცხადა, მოგვიანებით — დასთანხმდა. მეორედ გიორგი გახარია დისტანციურად 2 ივლისს გამოიკითხა.

მეტი ჩორჩანას საქმეზე: