ყაზახეთის პარლამენტის ქვედა პალატამ კანონი მიიღო, რომელიც ინტერნეტსა და მედიაში "ლგბტ პროპაგანდას" კრძალავს. კანონის დარღვევისთვის გათვალისწინებულია ჯარიმები, ხოლო განმეორებითი შემთხვევისას — 10 დღემდე პატიმრობა. ამის შესახებ ინფორმაციას Reuters ავრცელებს.

კანონი ახლა ყაზახეთის სენატში გადაიგზავნება, სადაც, სავარაუდოდ, დაამტკიცებენ.

ყაზახეთის პრეზიდენტმა კასიმ-ჟომარტ ტოკაევმა, რომლის ხელმოწერაც კანონის ძალაში შესასვლელად საჭიროა, ბოლო თვეებში არაერთხელ გაუსვა ხაზი "ტრადიციული ღირებულებების" დაცვის აუცილებლობას.

Reuters-ის ცნობით, პარლამენტის წევრებმა, რომელთა უმეტესობაც ტოკაევისადმი ლოიალურ პარტიებს ეკუთვნის, კანონს მხარი ერთხმად დაუჭირეს, ხოლო ადამიანის უფლებათა დამცველმა ორგანიზაციებმა ხელისუფლებას მოუწოდეს, ეს კანონი არ მიეღოთ.

ყაზახეთის განათლების მინისტრმა განი ბეისემბაევმა, რომელიც კანონპროექტს მხარს უჭერს, პარლამენტარებს უთხრა:

"ბავშვები და მოზარდები ყოველდღიურად ხვდებიან ინტერნეტში ინფორმაციას, რომელიც შეიძლება უარყოფითად აისახოს მათ წარმოდგენებზე ოჯახის შესახებ, მათ მორალზე და მომავალზე."