ევროკავშირის აღმასრულებელი ორგანო დემოკრატიული მდგრადობის ცენტრის შექმნას გეგმავს, რომელიც რუსეთისა და სხვა ავტორიტარული რეჟიმებიდან მომდინარე დეზინფორმაციის წინააღმდეგ იმუშავებს. ამის შესახებ ინფორმაციას The Guardian ავრცელებს.

ცენტრი გააერთიანებს ექსპერტებს როგორც ევროკავშირის წევრი, ისე გაწევრიანების მსურველი ქვეყნებიდან, რათა ებრძოლონ უცხოური ინფორმაციით მანიპულირებასა და ჩარევას. ინიციატივა ევროკომისიის პრეზიდენტს, ურსულა ფონ დერ ლაიენს ეკუთვნის.

ფონ დერ ლაიენმა დემოკრატიული მდგრადობის ევროპული ცენტრის შექმნის იდეა პირველად სექტემბერში დააანონსა. დოკუმენტი, რომლის გამოქვეყნებაც 12 ნოემბერსაა დაგეგმილი, უფრო დეტალურად აღწერს ცენტრის კონცეფციას და ხაზს უსვამს, თუ სად ხედავს კომისია მთავარ საფრთხეს.

"უკრაინის წინააღმდეგ წარმოებული აგრესიული ომის გარდა, რუსეთი აძლიერებს ჰიბრიდულ თავდასხმებს და ევროპის წინააღმდეგ გავლენისთვის ომს აწარმოებს... მათ მცდარი ნარატივების გავრცელებით, ზოგჯერ ისტორიული ფაქტების მანიპულირებითა და გაყალბებით, სურთ შეარყიონ ნდობა დემოკრატიული სისტემებისადმი," — წერს Guardian.

გამოცემა წერს, რომ ცენტრში მონაწილეობა ნებაყოფლობითი იქნება როგორც ევროკავშირის წევრი ქვეყნების, ასევე კანდიდატებისათვის. ევროკომისია ასევე განიხილავს შესაძლებლობას, რომ მონაწილეობა შესთავაზოს "მსგავსად მოაზროვნე პარტნიორებს", რაც შესაძლოა გაერთიანებული სამეფოს ჩართვის შესაძლებლობადაც იქცეს.

ბრიუსელი ასევე გეგმავს "ინტერნეტ-ინფლუენსერთა" ნებაყოფლობითი ქსელის ჩამოყალიბებას, რათა საზოგადოებას ევროკავშირის დემოკრატიული სტანდარტები და ინტერნეტთან დაკავშირებული წესები გააცნონ.