პარტია თავისუფლების მოედნის ლიდერი ლევან ცუცქირიძე წერს, რომ 28 ნოემბერს ერთი წელი სრულდება, რაც ოცნებამ ევროკავშირთან მოლაპარაკებები შეწყვიტა და მოქალაქეებს მოუწოდებს, რაც შეიძლება "ბევრი შევიკრიბოთ იმის საჩვენებლად, რომ სამართლიანობისთვის ბრძოლა არათუ სრულდება, არამედ ფართოვდება და ძალებს იკრებს".

მისი თქმით, დაპატიმრებულები არიან მასწავლებლები, ჟურნალისტები, მწერლები, მსახიობები, ექიმები და სტუდენტებიც კი — ვინც ჩვენ ქვეყანას მომავლისკენ უნდა გაუძღვეს. ეს ყველაფერი სრულიად საპირისპიროა ოჯახების პატივისცემის, შემწყნარებლობის, ჰუმანიზმის ტრადიციულ ქართულ ღირებულებებთან.

ცუცქირიძის თქმით, საქართველოს ახლა ერთ სულ მოსახლეზე უფრო მეტი პოლიტიკური პატიმარი ჰყავს, ვიდრე რუსეთს.

"პოლიტიკოსების წინააღმდეგ წაყენებული ბრალდებები უჩვენებს, რომ ივანიშვილის პარტიას არ შეუძლია ფუნდამენტური პრობლემების გადაჭრა. მათ ვერ მოაგვარეს სიღარიბის, დაუცველობის, ჯანდაცვის, სამართლიანობის, ემიგრაციის პრობლემები. სამაგიეროდ, თავად უზომოდ გამდიდრდნენ ხალხისათვის მოპარული ფულით. სწორედ ამიტომ ძალაუფლების შესანარჩუნებლად მათ მხოლოდ რეპრესიისა და უთანხმოების თესვის გზა დარჩა.

მძიმე დღეებია: საქართველოს ახლა ერთ სულ მოსახლეზე უფრო მეტი პოლიტიკური პატიმარი ჰყავს, ვიდრე რუსეთს. ყველაფერი ეს ძალიან უსამართლოა. რასაც არ უნდა ფიქრობდეთ ამ ადამიანებზე, ისინი ხმას იმაღლებდნენ იმისათვის, რისიც სჯეროდათ.

ქართულმა ოცნებამ პოლიტპატიმართა შვილები იმისთვის გაწირა, რომ მათ მშობლები თვეების, პოლიტიკოსების შემთხვევაში კი, წლების განმავლობაში ვეღარ იხილონ. დაპატიმრებულები არიან მასწავლებლები, ჟურნალისტები, მწერლები, მსახიობები, ექიმები და სტუდენტებიც კი — ვინც ჩვენ ქვეყანას მომავლისკენ უნდა გაუძღვეს. ეს ყველაფერი სრულიად საპირისპიროა ოჯახების პატივისცემის, შემწყნარებლობის, ჰუმანიზმის ტრადიციულ ქართულ ღირებულებებთან და ეწინააღმდეგება ყველა იმ ფასეულობას, რომელიც ჩვენი საუკეთესო წინაპრებისგან გადმოგვეცა.

რთული დღეებია პატიმართა ოჯახებისთვის. ეს ვერ იქნება საკმარისი ნუგეში, მაგრამ ჩვენ მათ გვერდით ვართ, ხოლო ზურგს ისტორიაც უმაგრებთ - სამართლიანობისთვის ბრძოლისა და შეუპოვრობის მდიდარი გამოცდილება.

მოგიწოდებთ თანამოქალაქეებს, რომ კიდევ უფრო ორგანიზებულად და მეტი შემართებით ჩავერთოთ მიტაცებული სახელმწიფოს ხალხისათვის დაბრუნების საქმეში. 28 ნოემბერს ერთი წელი სრულდება, რაც "ოცნებამ" ევროკავშირთან მოლაპარაკებები შეწყვიტა და ამით მოქალაქეებს წაართვა ღირსეული ცხოვრების, სამართლიანი სახელმწიფოს და ეკონომიკური დაცულობის პერსპექტივა. უახლოეს ხანებში გაგაცნობთ თანამოაზრეებთან შეთანხმებულ გეგმას, თუ როგორი იქნება პროტესტის გეგმა ამ დღეს. უნდა შევიკრიბოთ ძალიან ბევრნი იმის საჩვენებლად, რომ სამართლიანობისთვის ბრძოლა არათუ სრულდება, არამედ ფართოვდება და ძალებს იკრებს.

და ბოლოს — გასულ კვირას ჩვენ დეტალური გეგმა გამოვაქვეყნეთ იმაზე, თუ როგორ ვხედავთ ბრძოლის გზას. გამოგვყევით ამ გზაზე, შემოუერთდით პროტესტს და ერთად კიდევ უფრო მალე მივაღწევთ ჩვენს საერთო მიზანს", — წერს ლევან ცუცქირიძე.