ტელეკომპანია რუსთავი 2 თვითმმართველობის არჩევნებამდე ორი კვირით ადრე თბილისში ჩატარებული კვლევის შედეგებს ასაჯაროებს. ამ კვლევის მიხედვით, მოქმედი მერის, დავით ნარმანიას მუშაობაზე გამოკითხული მოსახლეობის 41 პროცენტი ამბობს, რომ "ძალიან არ მოსწონს".

კვლევის მიხედვით, ნარმანიას მუშაობა "ძალიან მოსწონს" გამოკითხულთა მხოლოდ 2 პროცენტს, "გარკვეულწილად მოსწონს" - 23 პროცენტს, "გარკვეულწილად არ მოსწონს" - 27 პროცენტს.

როგორც რუსთავი 2 ავრცელებს ინფორმაციას, მსგავსი კითხვა ყოფილ მერთან, გიგი უგულავასთან დაკავშირებითაც დასვეს, პასუხები კი ასე გადანაწილდა:

  • ძალიან მომწონდა - 13 პროცენტი;
  • გარკვეულწილად მომწონდა - 36 პროცენტი;
  • გარკვეულწილად არ მომწონდა - 20 პროცენტი;
  • ძალიან არ მომწონდა - 22 პროცენტი.

ტელეკომპანია რუსთავი 2-მა კვლევა Edison Research-ს დაუკვეთა. კვლევა 22 სექტემბრიდან 2 ოქტომბრის ჩათვლით თბილისში ჩატარდა და შემთხვევითი შერჩევის მეთოდით, ხმის მიცემის უფლების მქონე 1200 ადამიანი გამოიკითხა. კვლევის ცდომილება 3 პროცენტია.