თბილისის ფინანსური სამიტის ფარგლებში, საქართველოს ეროვნული ბანკის ვიცე-პრეზიდენტმა ნინო ჯელაძემ პანელურ დისკუსიაში მიიღო მონაწილეობა.

პანელზე სახელწოდებით — შემდეგი ინოვაციური ციკლი ფინანსურ სერვისებში განიხილეს ცენტრალური ბანკების შესაძლებლობები — თუ როგორ უნდა უზრუნველყონ მათ ფინანსური სერვისების სექტორის კონკურენტუნარიანობა და ახალი ტექნოლოგიების დანერგვა.

შეხვედრა მრგვალი მაგიდის ფორმატში გაიმართა, მხარეებმა გაცვალეს მოსაზრებები, იმისთაობაზე, თუ როგორ ხედავენ ფინანსური ინფრასტრუქტურის მომავალს.

ფოტო: საქართველოს ეროვნული ბანკი

სებ-ის ვიცე-პრეზიდენტთან ერთად დისკუსიაში მონაწილეობდნენ არმენ ნურბეკიანი — სომხეთის ცენტრალური ბანკის პრეზიდენტის მოადგილე, კლაუდიუ ნეგრეა — რუმინეთის ეროვნული ბანკის დირექტორის მოადგილე, ლინარდო მარტინჩევიჩი — ხორვატიის ეროვნული ბანკის მმართველის ოფისის მრჩეველი, იზვან ალი — Nexus Global Payments-ის მრჩეველი, ბობ უორდროპი - კემბრიჯის უნივერსიტეტის პროფესორი, სიდჰარტ შეტი — Finternet Labs-ის აღმასრულებელი დირექტორი, ,ჯაილს დიქსონი — Tether-ის მარეგულირებელი და სალიცენზიო საკითხების გლობალური ხელმძღვანელი, გიორგი ვახტანგიშვილი — საქართველოს ბანკის ციფრული მიმართულების ხელმძღვანელი, დმიტრი ბოჩაროვი — Pave Bank-ის რისკების მთავარი ოფიცერი და თანადამფუძნებელი.

ასევე, მხარეებმა განიხილეს მარეგულირებელი უწყებებისა და ცენტრალური ბანკების როლი, ფინანსური ინოვაციების დანერგვის ხელშეწყობის პროცესში და ტექნოლოგიების საფინანსო სექტორში ინტეგრაციისას არსებული გამოწვევები.

ნინო ჯელაძემ ისაუბრა ქართულ გამოცდილებაზე, მათ შორის საქართველოს ცვალებად ფინანსურ ეკოსისტემაზე და ახალი ინსტიტუტების შექმნაზე, როგორებიც არის ვირტუალური აქტივების მომსახურების პროვაიდერები და ფინტექ პლატფორმები.

ვიცე-პრეზიდენტმა ხაზი გაუსვა საქართველოს ეროვნული ბანკის როლს, ფინანსური სტაბილურობისა და ფინანსური ინოვაციების დანერგვის პროცესში. ასევე, ისაუბრა სებ-ის გამოცდილებაზე ახალი ფინტექ მოთამაშეებისთვის მარეგულირებელი ჩარჩოს შემუშავების საქმეში.

ფოტო: საქართველოს ეროვნული ბანკი

ფოტო: საქართველოს ეროვნული ბანკი

პანელური დისკუსიის მოდერატორი იყო, პატ პატელი — GFTN-ის ფორუმების აღმასრულებელი დირექტორი.

თბილისის ფინანსური სამიტი, რომელსაც 50-ზე მეტი ქვეყნის წარმომადგენელი და 1 000-ზე მეტი დელეგატი ესწრება, სინგაპურის გლობალური ფინანსური და ტექნოლოგიური ქსელის (GFTN) ღონისძიებების სერიის შემადგენელი ნაწილია. GFTN — წამყვანი საერთაშორისო ქსელია ფინანსური ტექნოლოგიების სფეროში, საქართველო კი ამ ქსელის ნაწილი გახდა.