პროკურატურის ინფორმაციით, გიგა ავალიანის საქმეზე დაკავებულ ორ პირს ბრალდება წარუდგინეს. უწყების განცხადებაში ვკითხულობთ, რომ ბრალდებულმა გიგა ავალიანს სახეში მუშტი დაარტყა, რის შემდეგაც ის წაიქცა და სიცოცხლისათვის სახიფათო მძიმე დაზიანება მიიღო. აღნიშნულ პირს თავდაპირველად 117-ე მუხლის პირველი ნაწილით წარედგინა ბრალდება, მაგრამ მას შემდეგ, რაც ავალიანი 25 ოქტომბერს საავადმყოფოში გარდაიცვალა, აღნიშნულ პირს ბრალდება დაუმძიმდა.

"საქართველოს პროკურატურამ ჯანმრთელობის განზრახ მძიმე დაზიანების, რამაც ადამიანის სიცოცხლის მოსპობა გამოიწვია და დანაშაულის შეუტყობინებლობის ფაქტებზე ორ პირს ბრალდება წარუდგინა.

შინაგან საქმეთა სამინისტროში ჩატარებული გამოძიებით დადგინდა, რომ მიმდინარე წლის 1-ელ ოქტომბერს, თბილისში, ზღვის უბნის დასახლებაში, ბრალდებულმა მეგობარ გოგონასთან არასასურველი კომუნიკაციის და ეჭვიანობის გამო, დაზარალებულს სახის არეში მუშტი დაარტყა, რის შედეგადაც იგი წაიქცა და სიცოცხლისათვის სახიფათო მძიმე დაზიანება მიიღო. დაზარალებული 24 ოქტომბერს სამედიცინო დაწესებულებაში გარდაიცვალა. მძიმე დანაშაულის ჩადენის მომენტში შემთხვევის ადგილზე იმყოფებოდა კიდევ ერთი პირი, რომელმაც აღნიშნული ფაქტის ამსახველი ვიდეო გადაიღო და მომხდარი მძიმე დანაშაულის შესახებ სამართალდამცავ ორგანოებს არ შეატყობინა.

სამართალდამცველებმა დანაშაულის ჩამდენი არასრულწლოვანი პირი 19 ოქტომბერს დააკავეს. დაკავებულს ბრალდება საქართველოს სისხლის სამართლის კოდექსის 117-ე მუხლის პირველი ნაწილით წარედგინა და აღკვეთის ღონისძიების სახით პატიმრობა შეეფარდა.დაზარალებულის გარდაცვალების შემდგომ დაკავებულს ბრალდება დაუმძიმდა და ბრალი საქართველოს სისხლის სამართლის კოდექსის 117-ე მუხლის მე-2 ნაწილით (ჯანმრთელობის განზრახ მძიმე დაზიანება, ესე იგი სხეულის დაზიანება, რომელიც სახიფათოა სიცოცხლისთვის, რამაც გამოიწვია სიცოცხლის მოსპობა) წარედგინა," — ვკითხულობთ პროკურატურის განცხადებაში.

1-ელ ოქტომბერს, თემქის დასახლებაში, ერთ-ერთი საცხოვრებელი კორპუსის მიმდებარე ტერიტორიაზე, 28 წლის მათემატიკის მასწავლებელ და ექიმ გიგა ავალიანს თავს დაესხნენ. თავდასხმისას მიღებული მძიმე თავის ტრავმით ავალიანი საავადმყოფოში მოათავსეს, სამ კვირაში კი, 24 ოქტომბერს გარდაიცვალა.

გარდაცვლილის დედის, ეკა კუპატაძეს ინფორმაციით, გიგა ავალიანი 16 წლის ნ.ი.-ს მათემატიკის რეპეტიტორი იყო. კუპატაძემ სოციალურ ქსელში გაავრცელა ავალიანსა და არასრულწლოვანს შორის მიმოწერა და მისი განცხადებით, "ამ მიმოწერით აეჭვიანა ნ.ი-მ შეყვარებული ა.გ."

შსს-მ NEWS.On.ge-ს განუცხადა, რომ გამოძიება გრძელდება. ამ დროისთვის უცნობია 2009 წელს დაბადებული ნ.ი. წინააღმდეგ რა სამართლებრივი ზომები გატარდება. 25 ოქტომბერს, გარდაცვლილის დედამ, ეკა კუპატაძემ სოციალურ ქსელში ვიდეო გამოაქვეყნა, სადაც დამნაშავეების დასჯას ითხოვდა.