1-ელ ოქტომბერს, თემქის დასახლებაში, ერთ-ერთი საცხოვრებელი კორპუსის მიმდებარე ტერიტორიაზე, 28 წლის მათემატიკის მასწავლებელ და ექიმ გიგა ავალიანს თავს დაესხნენ. თავდასხმისას მიღებული მძიმე თავის ტრავმით ავალიანი საავადმყოფოში მოათავსეს, სამ კვირაში კი, 24 ოქტომბერს გარდაიცვალა. აღნიშნულ ფაქტთან დაკავშირებით, შსს-მ ორი პირი დააკავა.

რა მოხდა?

გარდაცვლილის დედის, ეკა კუპატაძეს ინფორმაციით, გიგა ავალიანი 16 წლის ნ.ი.-ს მათემატიკის რეპეტიტორი იყო. კუპატაძემ სოციალურ ქსელში გაავრცელა ავალიანსა და არასრულწლოვანს შორის მიმოწერა და მისი განცხადებით, "ამ მიმოწერით აეჭვიანა ნ.ი-მ შეყვარებული ა.გ."

25 ოქტომბერს, შინაგან საქმეთა სამინისტროს ინფორმაციით, მომხდართან დაკავშირებით, 2008 წელს დაბადებული ა.გ. ჯანმრთელობის განზრახ მძიმე დაზიანების ბრალდებით დააკავეს. უწყების ინფორმაციით, აღნიშნულმა პირმა დანაშაული "ეჭვიანობის ნიადაგზე" ჩაიდინა. გამოძიება სისხლის სამართლის კოდექსის 117-ე მუხლით მიმდინარეობს.

"შინაგან საქმეთა სამინისტროს თბილისის პოლიციის დეპარტამენტის გლდანი-ნაძალადევის მთავარი სამმართველოს თანამშრომლებმა, ჩატარებული ოპერატიული ღონისძიებებისა და საგამოძიებო მოქმედებების შედეგად, 2008 წელს დაბადებული ა.გ. ჯანმრთელობის განზრახ მძიმე დაზიანების ბრალდებით დააკავეს.

გამოძიებით დადგინდა, რომ ბრალდებული თბილისში, თემქის დასახლებაში, ერთ-ერთი საცხოვრებელი კორპუსის მიმდებარე ტერიტორიაზე, 1997 წელს დაბადებულ გ.ა. -ს ფიზიკურად გაუსწორდა და ჯანმრთელობის მძიმე დაზიანება მიაყენა. სამართალდამცველებმა ჩატარებული ოპერატიული ღონისძიებებისა და საგამოძიებო მოქმედებების შედეგად ა.გ. ბრალდებულის სახით დააკავეს.

დაშავებული ახალგაზრდა მამაკაცი კრიტიკული მდგომარეობით საავადმყოფოში მოათავსეს, სადაც სამედიცინო დახმარება უტარდებოდა , თუმცა მომდევნო დღეების განმავლობაში მისი ჯანმრთელობის მდგომარეობა კიდევ უფრო დამძიმდა და ის 24 ოქტომბერს გარდაიცვალა," — ვკითხულობთ უწყების განცხადებაში.

26 ოქტომბერს, შსს-ს ინფორმაციით, დააკავეს 2007 წელს დაბადებული გ.რ., რომელსაც ბრალად მძიმე დანაშაულის შეუტყობინებლობა ედება ბრალად. უწყების განცხადებაში ვკითხულობთ, რომ აღნიშნული პირიუკვე დაკავებულ პირთან ა.გ.-თან ერთად შემთხვევის ადგილზე იმყოფებოდა და შემდეგ ადგილიდან მიიმალნენ.

"გამოძიების მიერ მოპოვებული მტკიცებულებებით დგინდება, რომ გ.რ. შემთხვევის ადგილზე იმყოფებოდა, თუმცა მან დანაშაულის შესახებ სამართალდამცველებს არ შეატყობინა და ამავე საქმეზე უკვე დაკავებულ პირთან -2008 წელს დაბადებულ ა.გ.-სთან ერთად ადგილიდან მიიმალა," — ვკითხულობთ უწყების განცხადებაში.

შსს-მ NEWS.On.ge-ს განუცხადა, რომ გამოძიება გრძელდება. ამ დროისთვის უცნობია 2009 წელს დაბადებული ნ.ი. წინააღმდეგ რა სამართლებრივი ზომები გატარდება. 25 ოქტომბერს, გარდაცვლილის დედამ, ეკა კუპატაძემ სოციალურ ქსელში ვიდეო გამოაქვეყნა, სადაც დამნაშავეების დასჯას ითხოვდა.