სპეციალური პენიტენციური სამსახური გიორგი ჩიკვაიძის დედის, ეკა წერეთლის განცხადებას ეხმაურება. წერეთლის განაცხადებით, მისი შვილის შიმშილობის მიზეზი წამებასთან გათანაბრებული ქმედება, საკვების არ მიწოდების გამო, შემდგომი დაძალება თითქოს ეს თავად მოითხოვეს და მათზე დღეს განხორციელებული "ძველბიჭური" მუქარა" გახდა.

პენიტენციური სამსახურის განცხადებით, ეკა წერეთლის განცხადება სიმართლეს არ შეესაბამება და მსჯავრდებული გიორგი ჩიკვაიძე "შერჩევითად" იღებს ციხეში შეთავაზებულ საკვებს და "სისტემატურად აგრძელებს პროვოკაციულ ქმედებებს".

"სპეციალური პენიტენციური სამსახური მუდმივ რეჟიმში უზრუნველყოფს მსჯავრდებულთა სრულფასოვან კვებას, თუმცა მსჯავრდებული გ. ჩიკვაიძე შერჩევითად იღებს გარკვეული სახეობის პროდუქტებს და სისტემატურად აგრძელებს პროვოკაციულ ქმედებებს, რომელთა მიზანია პენიტენციური სამსახურის დისკრედიტაცია — თითქოს სამსახური ვერ უზრუნველყოფს მსჯავრდებულს შესაბამისი კვებით, რაც ცალსახად არ შეესაბამება სიმართლეს და წარმოადგენს ცილისწამებას," — ვკითხულობთ განცხადებაში.

სამსახურის განცხადებაში ასევე ვკითხულობთ, რომ ჩიკვაიძემ სიტყვიერი შეურაცხყოფა მიაყენა პენიტენციურ დაწესებულებაში სამეურნეო სამუშაოებში ჩარიცხულ საკვების დარიგებაზე უფლებამოსილ მსჯავრდებულს.

"2025 წლის 26 ოქტომბერს, 13:22 საათზე მსჯავრდებულებს შეეთავაზათ სადილი, რა დროსაც მსჯავრდებულმა გ. ჩიკვაიძემ სიტყვიერი შეურაცხყოფა მიაყენა პენიტენციურ დაწესებულებაში სამეურნეო სამუშაოებში ჩარიცხულ საკვების დარიგებაზე უფლებამოსილ მსჯავრდებულს, რომელიც გადაადგილდებოდა დაწესებულების მორიგე თანამშრომელთან ერთად. მსჯავრდებული გ. ჩიკვაიძე, ასევე, არ დაემორჩილა მორიგე თანამშრომლის კანონიერ მოთხოვნას აღნიშნული მართლსაწინააღმდეგო ქმედების შეწყვეტის შესახებ და იგი კვლავ აგრძელებდა სიტყვიერი შეურაცხყოფის მიყენებას სამეურნეო სამუშაოებში ჩარიცხული მსჯავრდებულის მიმართ," — ვკითხულობთ სამსახურის განცხადებაში.

შეგახსენებთ, 26 ოქტომბერს, საპროტესტო აქციების დროს დაკავებულმა ანზორ კვარაცხელიამ და დიდი ოდენობით თანხის მართლსაწინააღმდეგოდ მითვისებაში მსჯავრდადებულებმა გიორგი ჩიკვაიძემ, ირაკლი პაპიაშვილმა შიმშილობა დაიწყეს.

ასევე იხილეთ: