სპეციალურმა პენიტენციურმა სამსახურმა გიორგი ჩიკვაიძის საკნიდან ჩაწერილ ვიდეოკადრებს ავრცელებს. უწყების განცხადებით, გიორგი ჩიკვაიძის ოჯახის მიერ გავრცელებული ინფორმაცია მასზე არასათანადო მოპყრობასთან დაკავშირებით სიმართლეს არ შეესაბამება.

პენიტენციურის განცხადებით, გავრცელებული ვიდეომასალა 20-22 სექტემბრის ეპიზოდებს აღნიშნავს, სადაც ჩანს, თუ როგორ იღებს ჩიკვაიძე თავის თანამესაკნეებთან ერთად კვების რაციონში გათვალისწინებულ და მაღაზიაში შეძენილ საკვებს. უწყება ასევე ხაზს უსვამს, რომ ჩიკვაიძე ღვიძლის უკმარისობისთვის განკუთვნილი რაციონით იკვებება, შესაბამისად "მას მიეწოდა საკვები (კოტლეტი). მისი თანამესაკნეების მენიუთი 2025 წლის 22 სექტემბერს კოტლეტი გათვალისწინებული საერთოდ არ ყოფილა".

პენიტენციური სამსახურის მიერ გავრცელებულ კადრებს ჩიკვაიძის დედა, ეკა წერეთელი გამოეხმაურა. წერეთლის განცხადებით, მისმა შვილმა შიმშილობა 23 სექტემბერს დაიწყო და ლაბორატორიული კვლევები აქვს, სადაც ჩიკვაიძეს ღვიძლის და თირკმლის უკმარისობა აღენიშნება.

"უსუსურებო. გიორგის კადრები რომ გაავრცელეთ 22 სექტემბრის რიცხვით ადამიანმა შიმშილობა დაიწყო 23 სექტემბრის დილით 9 საათზე და ხელთ მაქვს უკვე 26-ში თქვენი ციხის ლაბორატორიული კვლევები. დაწყებულია თირკმლის და ღვიძლის უკმარისობა. მზად ვარ ეს ანალიზებიც გავასაჯაროო. მართლა რა უსუსურები და მატყუარები ხართ, ვინმე ჭკვიან ადამიანს მაინც დაეკითხეთ," — წერს ეკა წერეთელი.

შეგახსენებთ, გიორგი ჩიკვაიძის დედამ, 22 სექტემბერს გაავრცელა ინფორმაცია, რომ "ნოდარ მელაძის შაბათში" გასული რეპორტაჟის შემდეგ, რომელიც ქოლ-ცენტრებს ეხებოდა, ჩიკვაიძეს პირადი პაემნები, კერძოდ მშობლებთან პირისპირ შეხვედრა აეკრძალა. ჩიკვაიძემ პენიტენციურის ამ გადაწყვეტილების შემდეგ შიმშილობა დაიწყო.

ცნობისთვის, დაპატიმრებულმა ბიზნესმენმა შიმშილობა მიმდინარე წლის 12 მარტსაც გამოაცხადა. 9-დღიანი შიმშილობის შემდეგ ჩიკვაიძის მდგომარეობა დამძიმდა და ის საავადმყოფოში გადაიყვანეს.