საპროტესტო აქციების დროს დაკავებულმა ანზორ კვარაცხელიამ და დიდი ოდენობით თანხის მართლსაწინააღმდეგოდ მითვისებაში მსჯავრდადებულებმა გიორგი ჩიკვაიძემ, ირაკლი პაპიაშვილმა შიმშილობა დაიწყეს. ამის შესახებ ჩიკვაიძის დედა, ეკა წერეთელი სოციალურ ქსელში წერს.

მისი თქმით, შიმშილობის მიზეზი წამებასთან გათანაბრებული ქმედება, საკვების არ მიწოდების გამო, შემდგომი დაძალება თითქოს ეს თავად მოითხოვეს და მათზე დღეს განხორციელებული "ძველბიჭური" მუქარა" გახდა.

"შიმშილობა ციხეში! 5 წუთის წინ დამიკავშირდა სახალხო დამცველის აპარატის წარმომადგენელი. მაცნობა, რომ გლდანის ციხის მე-8 დაწესებულებაში საკანი 84 ში სამივე წევრმა დაიწყო შიმშილობა. გიორგი ჩიკვაიძე, ირაკლი პაპიაშვილი, ანრი კვარაცხელია. მიზეზი წამებასთან გათანაბრებული ქმედება, საკვების არ მიწოდების გამო, შემდეგ დაძალება, თითქოს ეს თავად მოითხოვეს და მათზე დღეს განხორციელებული "ძველბიჭური" მუქარა ციხის თანამშრომელ, ვინმე გიორგისგან, რომელმაც განუცხადა: "თავს დაგამახსოვრებინებ ბიჭო", — წერს ეკა წერეთელი სოციალურ ქსელში.