საზოგადოებრივი მაუწყებელი ქართული ოცნებას ყველა მაუწყებლისთვის საერთო ეთერის შეთავაზებაზე პასუხობს, რომ არ გეგმავს ფორმატის ცვლილებას. ამის შესახებ საზოგადოებრივმა მაუწყებელმა განცხადება გაავრცელა.

"პირველი არხი ახორციელებს წინასაარჩევნო პროექტს, რომლის ფარგლებშიც თვითმმართველი ქალაქებისა და ადმინისტრაციული სამხარეო ცენტრების მერობის კანდიდატებს ეძლევათ წინასწარ შეთანხმებული ფორმატით, თანაბარ პირობებში დებატების შესაძლებლობა", - აცხადებენ საზოგადოებრივ მაუწყებელში.

ქართული ოცნების თბილისის მერობის კანდიდატის, კახა კალაძის შტაბის ხელმძღვანელმა, არჩილ თალაკვაძემ დღეს განაცხადა, რომ მათი კანდიდატი მზადაა საერთო დებატში მიიღოს მონაწილეობა, რომელიც ყველასთვის თანაბარ პირობებს უზრუნველყოფს.

ამ ეტაპზე ცნობილია, რომ TV პირველი მზადაა, საერთო დებატების გამართვაზე, ქართული ოცნების შეთავაზებას დათანხმდეს.