"კანონიერი ქურდის", მერაბ ჯანგველაძის ძმის, ბიზნესმენ ლევან ჯანგველაძის მკვლელობაში ბრალდებულ გელა უძილაურს უვადო პატიმრობა მიესაჯა — გადაწყვეტილება მოსამართლე გიორგი გელაშვილმა მიიღო. სასამართლომ ყოფილი სპეცრაზმელი განზრახ და ასევე შეკვეთით მკვლელობაში დამნაშავედ ცნო.

"რადიო თავისუფლების" ინფორმაციით, განაჩენის გამოცხადებამდე, უძილაურის ადვოკატმა დავით მუხიაშვილმა საბოლოო სიტყვით ისარგებლა და განაცხადა, რომ, დაკავების დღიდან, მისი დაცვის ქვეშ მყოფის "კილერად" წარმოდგენის მიზნით, მიზანმიმართული კამპანია მიმდინარეობდა". განაჩენის გამოცხადებამდე პროკურორმა ლევან ვეფხვაძემ უძილაურს ამ სიტყვებით მიმართა: "თქვენ გაგწირეს. გაგწირეს მკვლელობის შემდეგ და გაგწირეს დღესაც".

უძილაურმა ბოლო სხდომაზეც აღიარა დანაშაულის ჩადენა, მაგრამ უარყოფს მკვლელობის დაკვეთის ნაწილს.

13 ოქტომბერს, სასამართლო პროცესზე უძილაურმა განაცხადა, რომ პირადი ანგარიშსწორების მიზნით "იძია შური" ლევან ჯანგველაძეზე.

უძილაურის ჩვენების მიხედვით, 2022 წელს ის უკრაინაში სერგეი ბონდარენკოს დაუმეგობრდა, რომელსაც ბიტკოინების ბიზნესი ჰქონდა. ბრალდებულის განცხადებით, ბონდარენკოს ბიზნესთან დაკავშირებით კონფლიქტი მოუვიდა "ქართველ კრიმინალებთან, ჯანგველაძეებთან". უძილაურის ჩვენების ვერსიის მიხედვით, სწორედ ასე გაიცნო ლევან ჯანგველაძე, რომელმაც მოლაპარაკებაზე უარი თქვა და მას "ძალიან ცუდად მოექცა".

"რადიო თავისუფლების" ინფორმაციით, უძილაურის განაჩენით ჯანგველაძის მკვლელობის საქმის გამოძიება არ სრულდება. გამოძიება გრძელდება მკვლელობასთან დაკავშირებულ ორ საქმეზე — სანდრო (ჯანო) წივწივაძისა და ძმები მიქაძეების საქმეზე.

  • სანდრო (ჯანო) წივწივაძეს ბრალად ედება იმ იარაღის "გასხვისება", რომლითაც ლევან ჯანგველაძე მოკლეს. გელა უძილაურის რწმუნებით, იარაღი, რომლითაც ჯანგველაძეს ესროლა ისმა მეგობარმა, ვალერი თანიაშვილმა მკვლელობამდე ცოტა ხნით ადრე აჩუქა — პროკურატურის განმარტებით, თანიაშვილი გარდაცვლილია.
  • პროკურატურის ვერსიით, ძმებმა დავით და გიორგი მიქაძეებმა ბიზნესსაქმიანობასთან დაკავშირებულ და სხვადასხვა საკითხებზე დაპირისპირებულების მოტივით ლევან ჯანგველაძის შეკვეთილი მკვლელობის ორგანიზება მოახდინეს — მკვლელობის შესრულება გელა უძილაურს დაავალეს. უძილაურმა სასამართლო პროცესზე უარყო ძმების ცნობა.

მოწმეების ჩვენებებზე დაყრდნობით, საქმის ფიგურანტები და სავარაუდო დამკვეთები არიან ყოფილი გენერალური პროკურორი ოთარ ფარცხალაძე და 2013 წელს მოკლული "კანონიერი ქურდის", "დედ ჰასანის" შვილიშვილი ირაკლი უსოიანი.

მკვლელობა მიმდინარე წლის 14 მარტს გვიან ღამით ვაკეში, ჭავჭავაძის გამზირზე მოხდა. მაშინ, როცა ლევან ჯანგველაძე ახლობლის გასვენებიდან ბრუნდებოდა, გელა უძილაურმა მას ცეცხლი გაუხსნა. ბრმა გასროლილი ტყვიისგან გამვლელი ფეხში დაიჭრა. ამავე საქმეზე დანაშაულის იარაღის უკანონო გასაღების ბრალდებით სანდრო წივწივაძეა დაკავებულია.

17 ივლისს, პროკურატურამ გელა უძილაურს ბრალი განზრახ მკვლელობიდან შეკვეთით მკვლელობაზე გადაუკვალიფიცირა. ცნობისთვის, "ტვ პირველთან" საუბრისას ადვოკატი ტარიელ კაკაბაძე აცხადებდა, რომ პროკურატურამ უნდა ჩაატაროს შესაბამისი საგამოძიებო და საპროცესო მოქმედებები. კაკაბაძემ ასევე დასძინა, რომ სანდრო წივწივაძეს "აბსურდული ბრალი" აქვს წარდგენილი და აღნიშნული ბრალის ფორმულირებით პროკურატურა ცდილობდა "საქმეში არ ყოფილიყვნენ მკვლელობის შემკვეთები და მკვლელობის შემკვეთების მიმართ არ ყოფილიყო ჩატარებული არანაირი საგამოძიებო მოქმედებები".

მედიაში გავრცელებული ინფორმაციით, ძმები მიქაძეები კრიმინალურ სამყაროსთან და ოთარ ფირცხალაძესთან დაახლოებული პირები არიან.