ჯერემი სთრონგის მარკ ზაკერბერგი სულ სხვანაირი იქნება

ჯერემი სთრონგი ისეთი მარკ ზაკერბერგის განსახიერებისთვის ემზადება, როგორიც ეკრანზე ჯერ არ გვინახავს.

ჯერემი სთრონგი სერიალში Succession

ფოტო: Boston Globe

46 წლის მსახიობმა, რომელიც სერიალ Succession-ით არის ცნობილი, სულ ახლახან ისაუბრა Facebook-ის თანადამფუძნებლის როლზე ახალ ფილმში The Social Reckoning (სოციალური ანგარიშსწორება), რომელიც დევიდ ფინჩერისა და აარონ სორკინის 2010 წლის ჰიტის, The Social Network-ის გაგრძელებაა. სთრონგის ზაკერბერგი ეკრანზე ჯესი აიზენბერგის ოსკარზე ნომინირებული შესრულებიდან 15 წლის შემდეგ გამოჩნდება.

თუ სოციალურ ქსელში ზაკერბერგს ვხედავდით იმ პერიოდში, როცა სოციალური მედიის პლატფორმა ჯერ იქმნებოდა, The Social Reckoning უფრო თანამედროვე პერიოდზეა — ახალი ფილმი დაფუძნებულია Wall Street Journal-ის გამოძიებაზე ფეისბუქის ფაილები, რომელიც 2021 წელს გამოქვეყნდა.

სთრონგის თქმით, მას არ უსაუბრია აიზენბერგთან ზაკერბერგის როლის შესრულების თაობაზე. როგორც მან 18 ოქტომბერს Academy Museum Gala-ზე თქვა: "ვფიქრობ, [აიზენბერგის შესრულებას] არანაირი კავშირი არ აქვს იმასთან, რასაც მე გავაკეთებ".

მსახიობმა დაამატა, რომ სორკინთან უკვე ორჯერ უმუშავია — ფილმებზე The Trial of the Chicago 7 და Molly’s Game — და რომ "მესამე მცდელობა ყველაზე იღბლიანია".

რაც შეეხება სცენარს, სთრონგი ამბობს, რომ მოუთმენლად ელის ასეთი მრავალშრიანი პერსონაჟის შესრულებას.

"ეს ერთ-ერთი საუკეთესო სცენარია, რაც კი ოდესმე წამიკითხავს. ის ჩვენს დროზე საუბრობს და ეხება იმ ყველაზე მგრძნობიარე თემებს, რაც დღეს სამყაროში ხდება", — თქვა სთრონგმა — "ეს შესანიშნავი პერსონაჟია, საინტერესო, რთული, და მე მას დიდი სიფრთხილით, ემპათიითა და ობიექტურობით ვუდგები".

ჯერემი სთრონგთან ერთად ფილმში მონაწილეობენ მაიკი მედისონი და ჯერემი ალენ უაითი, ისინი განასახიერებენ Facebook-ის ინჟინერ ფრენსის ჰაუგენსა და WSJ-ის ჟურნალისტ ჯეფ ჰოროვიცს.

პირველი ფილმი, რომელმაც საუკეთესო ორიგინალური სცენარისთვის 2011 წელს ოსკარი მოიგო, აჩვენებდა აიზენბერგის ზაკერბერგს და კომპანიაში მის თანამზრახველებს — ედუარდო სავერინს (ენდრიუ გარფილდი), შონ პარკერს (ჯასტინ ტიმბერლეიქი) და ტყუპ ძმებს ტაილერ და კამერონ უინკლვოსებს (არმი ჰამერი), რომლებიც ამტკიცებდნენ, რომ ზაკერბერგმა ფეისბუქის იდეა მათ მოჰპარა.