ევროკავშირის საგარეო საქმეთა მინისტრების შეხვედრის დაწყებამდე, საქართველოს მე-5 პრეზიდენტმა, სალომე ზურაბიშვილმა თითოეულ მინისტრს ინდივიდუალურად მიმართა წერილით, რომელშიც აღწერს საქართველოში მიმდინარე მოვლენებსა და ბოლო პერიოდის პოლიტიკური პროცესების მწვავე განვითარებას. ამის შესახებ ინფორმაციას სალომე ზურაბიშვილის პრესსამსახურ ავრცელებს.

მათი ცნობით, წერილში ზურაბიშვილი ყურადღებას ამახვილებს იმ საფრთხეებზე, რომლებიც საქართველოს დემოკრატიულ მომავალს და ევროპულ გზას ემუქრება.

ის ევროკავშირის ლიდერებს მოუწოდებს, შეიმუშაონ თანმიმდევრული და ეფექტური პოლიტიკა რუსეთის ჰიბრიდული ომის საპასუხოდ, რომელიც, საფრთხეს უქმნის არა მხოლოდ საქართველოს, არამედ მთლიანად ევროპას.

როგორც ცნობილია, ევროკავშირის უმაღლესმა წარმომადგენელმა, კაია კალასმა, ევროკავშირის საგარეო საქმეთა საბჭოს შეხვედრის შემდეგ, საქართველოსთან დაკავშირებით განაცხადა, რომ "ნოემბერში ვიზების შესახებ ახალი რეგულაციის ძალაში შესვლასთან ერთად შესაძლებლობა მიეცემათ გააუქმონ უვიზო რეჟიმი ზოგიერთი ჯგუფისთვის".

"მინისტრებმა ძალიან მკაფიოდ გამოთქვეს აზრი კანონის უზენაესობისა და ადამიანის უფლებების შესახებ მდგომარეობასთან დაკავშირებით, რომ მდგომარეობა საქართველოში კვლავ უარესდება. ევროპელი ელჩების წინააღმდეგ პირადი თავდასხმები მიუღებელია და ამას ადგილი არ უნდა ჰქონდეს დიპლომატიაში. კომისია წელს მოგვიანებით წარადგენს ანგარიშს უვიზო მიმოსვლის მექანიზმის შეჩერების შესახებ. ნოემბერში ვიზების შესახებ ახალი რეგულაციის ძალაში შესვლასთან ერთად გვაძლევს შესაძლებლობას გავაუქმოთ უვიზო რეჟიმი ზოგიერთი ჯგუფისთვის", — განაცხადა კაია კალასმა.

კაია კალასის განცხადებას ოცნების პარლამენტის თავმჯდომარე, შალვა პაპუაშვილი გამოეხმაურა. ის წერს, რომ "ლუქსემბურგში გამართული საგარეო საქმეთა მინისტრთა საბჭო იყო კიდევ ერთი ხელიდან გაშვებული შანსი, ევროკომისრებს და მინისტრებს დაეგმოთ 4 ოქტომბერს საქართველოს პრეზიდენტის სასახლეზე ძალადობრივი შტურმი". ამის ნაცვლად კი "ცრუ ნარატივებით თავდასხმა მოისმინეს ქართველ ხალხზე".

"გუშინ, ლუქსემბურგში გამართული საგარეო საქმეთა მინისტრთა საბჭო იყო კიდევ ერთი ხელიდან გაშვებული შანსი, ევროკომისრებს და მინისტრებს დაეგმოთ 4 ოქტომბერს საქართველოს პრეზიდენტის სასახლეზე ძალადობრივი შტურმი. ნაცვლად ამისა კიდევ ერთხელ მოვისმინეთ ცრუ ნარატივებით თავდასხმა ქართველ ხალხზე.

მოძალადეებისთვის ხელის დაფარება ძალადობის გამართლებაა, ძალადობის გამართლება კი შემდგომი ძალადობის წახალისება.

ბრიუსელი უნდა დაუბრუნდეს ფუძემდებლურ ევროპულ ღირებულებებს და უარი თქვას ძალადობის, როგორც პოლიტიკური მიზნების მიღწევის იარაღის წახალისებაზე", — წერს პაპუაშვილი.