ქართული ოცნების პარლამენტმა შეკრება-მანიფესტაციებთან დაკავშირებული წესების გამკაცრების კანონპროექტი დაჩქარებული წესით მიიღო. კანონი ძალაში მას შემდეგ შევა, რაც მიხეილ ყაველაშვილი მას ხელს მოაწერს. კანონპროექტს მხარი დაუჭირა 80-მა დეპუტატმა, წინააღმდეგი არავინ იყო.

ადმინისტრაციულ სამართალდარღვევათა კოდექსის 174 პრიმა მუხლს ემატება მე-10 ნაწილი, რომლის მიხედვითაც აკრძალული ხდება:

  • აქციაზე სახის ნიღბით დაფარვა. ცრემლმდენი/ მომწამლავი ნივთიერების ქონა — 15-დღიანი პატიმრობა;
  • აქციისთვის გზის გადაკეტვა, რომელიც ტრანსპორტის მოძრაობას ხელს შეუშლის — 15-დღიანი პატიმრობა. აქციის ორგანიზატორს 20-დღიანი ადმინისტრაციული პატიმრობა შეეფარდება;
  • აქციაში მონაწილეობა, რომელიც შსს-ს მოთხოვნით შეწყვეტას ექვემდებარება — 60-დღიანი პატიმრობას; ამ ქმედების განმეორებით ჩადენა — 1 წლამდე პატიმრობას, მესამედ ჩადენა — 2 წლამდე პატიმრობას;
  • პოლიციელის დაუმორჩილებლობა — 1 წლამდე პატიმრობა, განმეორებით ჩადენა — 2 წლამდე პატიმრობა;

კანონპროექტში განმარტებულია, რომ ადმინისტრაციული პატიმრობა არ შეეფარდება ორსულს, დედას, რომელსაც 12 წლამდე ასაკის შვილი ჰყავს და 18 წლამდე შშმ პირის დედებს. აღნიშნული პირების მიმართ სადამსჯელო სახით ჯარიმა იქნება გამოყენებული.

"იმ პირების მიმართ, რომელთა მიმართაც არ შეიძლება გამოყენებული იყოს ადმინისტრაციული პატიმრობა, განსაზღვრულია 5000-ლარიანი ჯარიმა. თუ სამართალდამრღვევი ორგანიზატორია, მაშინ 15 000-ლარიანი ჯარიმა," — ვკითხულობთ კანონპროექტის განმარტებაში.

რაც შეეხება არასრულწლოვანებს, თავდაპირველად ოცნების პარლამენტის იურიდიული კომიტეტის თავმჯდომარემ, არჩილ გორდულაძემ განაცხადა, რომ "ქმედება ჩადენილი არასრულწლოვანის მიერ ისჯება ჯარიმით ან გამასწორებელი სამუშაოთი ვადით1 წლამდე ანდა თავისუფლების აღკვეთით ვადით 1 წლამდე". მესამე მოსმენაზე არჩილ გორდულაძემ განაცხადა, რომ აღნიშნული ჩანაწერი უქმდება, რადგან "მიზანშეწონილი არაა".

"როგორც მეორე მოსმენის განხილვის დროს გამართულ სხდომაზე გავაკეთეთ დათქმა კონკრეტული ჩანაწერის 347-ე მუხლში და ასევე 353-ე ტერცია მუხლთან დაკავშირებით, სამართალდამცავ ორგანოებთან და შესაბამის კომპეტენტურ სამსახურებთან კონსულტაციების საფუძველზე, აღნიშნული ჩანაწერის გაკეთების საჭიროებაც მიზანშეწონილი აღარ გახდა," — განაცხადა არჩილ გორდულაძემ.