სოციალ-დემოკრატების ფრაქციამ ევროპარლამენტს 1000-დან 2000-მდე ქართველ ჩინოვნიკსა და მათი ოჯახის წევრებს ევროკავშირში უვიზო მიმოსვლის უფლების ჩამორთმევისკენ მოუწოდა. ამის შესახებ ორშაბათს, 13 ოქტომბერს, ბრიუსელში გამართულ ბრიფინგზე ფრაქციის კოორდინატორმა საგარეო პოლიტიკის საკითხებში ნაჩო სანჩეს ამორმა, საქართველოდან დაბრუნების შემდეგ განაცხადა. დეტალებს რადიო თავისუფლება ავრცელებს.

Deutsche Welle-ს ცნობით, ამის მისაღწევად, ისინი ევროპარლამენტის მიერ 7 ოქტომბერს მიღებული ახალი მექანიზმის გამოყენებას უწევდნენ რეკომენდაციას, რომელიც ევროკომისიის გადაწყვეტილებით, ევროკავშირსა და მესამე ქვეყნებს შორის უვიზო მიმოსვლის შეჩერებას გულისხმობს, მათ შორის, ადამიანის უფლებების დარღვევის შემთხვევაში.

სანჩეს ამორის თქმით, ადამიანის უფლებების დარღვევებისა და ოპოზიციის დევნის საპასუხოდ უვიზო მიმოსვლის გაუქმება მხოლოდ ასამდე მაღალი თანამდებობის პირისთვის არაფრის მომცემი იქნება.

"არა, არა, მათ უნდა ეტკინოთ, სხვა შემთხვევაში ეს არ იმუშავებს. ჩვენი სურვილია, მივიტანოთ ეს იდეა ევროპარლამენტიდან ევროკომისიამდე. რადგან მივიღეთ ეს მექანიზმი, ის ეფექტური უნდა იყოს, ამისთვის კი მათი რაოდენობა უნდა იყოს არსებითი", — თქვა მან.

მისი შეთავაზების თანახმად, სავიზო შეღავათებით სარგებლობის საშუალება უნდა ჩამოერთვათ არა მხოლოდ მინისტრებსა და ქართული ოცნების უმაღლესი თანამდებობის პირებს, არამედ მოსამართლეებს, პროკურორებს, მათ მეუღლეებსა და შვილებს.

"პრობლემა მაშინ იწყება, როდესაც ავტოკრატიის საშუალო რგოლის წარმომადგენლები დგებიან რისკის ქვეშ, ვინაიდან ისინი იწყებენ ამაზე ჩივილს და ამბობენ: "მინისტრო, შევასრულე თქვენი მოთხოვნა, მაგრამ ახლა პრობლემა მაქვს — ვერ ვაგზავნი ჩემს შვილებს საფრანგეთში სასწავლებლად", — თქვა ევროპარლამენტარმა.

ბრიფინგზე მყოფმა ევროპარლამენტარებმა ხაზგასმით აღნიშნეს, რომ საქართველოს რიგითი მოქალაქეებისთვის ევროკავშირში უვიზო მიმოსვლის უფლების ჩამორთმევა შეცდომა იქნებოდა, რადგან ეს ნაბიჯი საქართველოს ხელისუფლების პროპაგანდას შეუწყობდა ხელს და არასწორ სიგნალს გაუგზავნიდა სამოქალაქო საზოგადოებას, რომელიც ევროპული ინტეგრაციის გაგრძელებისთვის იბრძვის.

ნაჩო სანჩეს ამორი გასულ კვირაში თბილისში იმყოფებოდა. ის სამოქალაქო საზოგადოებისა და ოპოზიციური პოლიტიკური პარტიების წარმომადგენლებს შეხვდა.