მიხეილ ყაველაშვილმა, ირაკლი კობახიძემ და შალვა პაპუაშვილმა კულტურის სფეროს წარმომადგენლები ბრწყინვალებისა და ღირსების ორდენებით დააჯილდოვა. ყაველაშვილის ადმინისტრაციის განცხადებაში ვკითხულობთ, რომ "ლაურეატებს სახელმწიფო ჯილდოები კულტურის სფეროში გამორჩეული მიღწევისთვის და საქართველოსთვის გაწეული აღმატებული ღვაწლისთვის, ასევე კულტურის განვითარებაში შეტანილი განსაკუთრებული წვლილისთვის გადაეცათ". სასახლეში გამართულ ღონისძიებას ოცნების კულტურის მინისტრი თინათ რუხაძე და კულტურის სფეროს წარმომადგენლები დაესწრნენ.

"უნიკალური ქართული ფოლკლორი, სტუმარ-მასპინძლობის ტრადიცია, ხუროთმოძღვრების ძეგლები, პოეზია, ქართული ცეკვა, პოლიფონია და ზოგადად, ქართული სახელოვნებო სფერო აღაფრთოვანებს ყველას, ვინც ერთხელ მაინც ეზიარება ამ უდიდეს მემკვიდრეობას. იმისთვის, რომ ეს სიმდიდრე დროსა და სივრცეში არ დაკარგულიყო და თაობიდან-თაობას გადასცემოდა, განსაკუთრებული წვლილი კონკრეტულ ადამიანებს, ჩვენთვის უძვირფასეს და გამორჩეულ ქართველებს შეჰქონდათ, რომლებიც ერთი მხრივ გვინახავდნენ, მეორე მხრივ კი ახალს სძენდნენ ჩვენს კულტურულ მემკვიდრეობას. სწორედ ამ უწყვეტობამ, ჩვენში გამჯდარმა ქართულმა კულტურამ და იმისმა რწმენამ, რომ მას დაცვა და გამდიდრება სჭირდება, განაპირობა კიდეც ჩვენი ერის გადარჩენა ყოველთვის, როდესაც საქართველოს რთული დრო ედგა. ყველა ეპოქას ჰყავს გამორჩეული გმირები, რომლებიც ჩვენი კულტურული მემკვიდრეობის კიდევ უფრო გამდიდრებასა და მომავალი თაობებისთვის გადაცემაზე ზრუნავენ. დღეს სწორედ თქვენ ხართ ის ადამიანები, ვინც ეს საპატიო მისია იტვირთეთ და ამ საქვეყნო საქმეს ღირსეულად ასრულებთ! სწორედ ამიტომ, ჩემთვის უდიდესი პატივია, რომ მაქვს შესაძლებლობა გაწეული ღვაწლისა და კულტურის განვითარებაში შეტანილი განსაკუთრებული წვლილისთვის, ქართველი ხალხისა და სახელმწიფოს სახელით, ბრწყინვალებისა და ღირსების ორდენებით დაგაჯილდოოთ. გილოცავთ და კიდევ ერთხელ, მთელი ერის სახელით გიხდით მადლობას ჩვენი ქვეყნისა და ხალხის წინაშე გაწეული ღვაწლისთვის," — ვკითხულობთ ყაველაშვილის ადმინისტრაციის განცხადებაში.