თავდაცვის ყოფილი მინისტრი, ბაჩო ახალაია რომელიც ცენტრალური კრიმინალური პოლიციის დეპარტამენტში გამოკითხვაზე 13:00 საათიდან იმყოფება, შეუძლოდ გახდა და სასწრაფო დახმარების ბრიგადის გამოძახება გახდა საჭირო.

ბაჩო ახალაია ცენტრალური კრიმინალური პოლიციის დეპარტამენტში მოწმის სახით გამოკითხვისა და ხმის ნიმუშის აღების მიზნით იყო დაბარებული. დღეს სუს-ში დაიბარეს ბაჩო ახალაიას ცოლი ანა ნადარეიშვილი.

"ტვ პირველის" ცნობით, ბაჩო ახალაიას ცოლი სუს-ში ტყეში ნაპოვნი საბრძოლო მასალის საქმეზეა დაბარებული. ანი ნადარეიშვილი ვარაუდობს, რომ სწორედ ამის შესახებ უთხრეს გამომძიებლებმა გამოკითხვაზე მყოფ ბაჩო ახალაიას და ამის გამო დასჭირდა სასწრაფოს დახმარება.

"ადამიანი 10 წლის განმავლობაში სამარტოო საკანში რომ ზის, ჯანმრთელობის პრობლემა, რა თქმა უნდა, ექნება. მაგრამ, მე ვფიქრობ, ისიც უთხრეს, ახლა რაც ჩემს თავს ხდება და შეიძლება, მაგის გამო ინერვიულა.

სრული აბსურდია, არანაირი კავშირი არ მაქვს (ტყეში ნაპოვნ იარაღებზე ), მაგრამ ამათგან არაფერი არ მიკვირს, ისეთი ამბავი დაატრიალეს ქვეყანაში. მივალ, გავერკვევი და უფრო დაწვრილებით გეტყვით. არანაირი კავშირი არ მაქვს და საერთოდ ეჭვი მეპარება, რომ რამე იპოვეს", — აცხადებს ნადარეიშვილი "ტვ პირველთან".