ისრაელმა და "ჰამასმა" სამშვიდობო გეგმის პირველ ფაზას ხელი მოაწერეს. ამის შესახებ ამერიკის შეერთებული შტატების პრეზიდენტმა, დონალდ ტრამპმა Truth Social-ზე დაწერა და აღნიშნავ, რომ "ეს არის უდიდესი დღე არაბული და მუსლიმური სამყაროსთვის, ისრაელისთვის, მის მეზობელი ქვეყნებისათვის და ამერიკის შეერთებული შტატებისთვის".

"ძალიან ამაყად ვაცხადებ, რომ ისრაელმა და "ჰამასმა" ჩვენი სამშვიდობო გეგმის პირველ ფაზას ხელი მოაწერეს. ეს ნიშნავს, რომ ყველა მძევალი ძალიან მალე გათავისუფლდება, ხოლო ისრაელი,შეთანხმებულ ხაზამდე, თავის ჯარებს გაყვანას დაიწყებს — როგორც პირველ ნაბიჯს ძლიერი, გამძლე და მარადიული მშვიდობისკენ. ყველა მხარეს სამართლიანად მოეპყრობიან! ეს არის უდიდესი დღე არაბული და მუსლიმური სამყაროსთვის, ისრაელისთვის, მის მეზობელი ქვეყნებისათვის და ამერიკის შეერთებული შტატებისთვის. ჩვენ მადლობას ვუხდით მედიატორებს კატარიდან, ეგვიპტიდან და თურქეთიდან, რომლებმაც ჩვენთან ერთად იმუშავეს, რათა ეს ისტორიული და უპრეცედენტო მოვლენა მომხდარიყო", — დაწერა დონალდ ტრამპმა.

შეთანხმების შემდეგ, ისრაელის პრემიერმინისტრი ბენიამინ ნეთანიაჰუ აშშ-ის პრეზიდენტ დონალდ ტრამპს ტელეფონით ესაუბრა. ამის შესახებ ინფორმაცია ადგილობრივმა მედიამ პრემიერის ოფისზე დაყრდნობით გაავრცელა. უწყების ცნობით, ნეთანიაჰუმ ტრამპი ისრაელის პარლამენტში სიტყვით გამოსვლისთვის მიიწვია.

"ორ ლიდერს შორის გაიმართა ძალიან ემოციური და თბილი საუბარი, რომლის დროსაც მათ ერთმანეთს ისტორიული მიღწევა — ყველა მძევლის გათავისუფლების შესახებ შეთანხმება — მიულოცეს," — ნათქვამია ნეთანიაჰუს ოფისის განცხადებაში.

სხვა განცხადებაში ნეთანიაჰუმ აღნიშნა, რომ ყველა მათი მძევალი შინ დაბრუნდება, რაც მისი თქმით, ისრაელის სახელმწიფოსთვის დიპლომატიური წარმატება, ეროვნული და მორალური გამარჯვებაა.

"გეგმის პირველი ფაზის დამტკიცებით, ყველა ჩვენი მძევალი შინ დაბრუნდება. ეს არის დიპლომატიური წარმატება, ეროვნული და მორალური გამარჯვება ისრაელის სახელმწიფოსთვის...თავიდანვე ცხადი გავხადე: არ მოვისვენებთ, სანამ ყველა მძევალი არ დაბრუნდება და ყველა ჩვენი მიზანი არ შესრულდება...მტკიცე ნებით, ძლიერი სამხედრო მოქმედებით და ჩვენი დიდი მეგობრისა და მოკავშირის, პრეზიდენტ ტრამპის უდიდესი ძალისხმევით, მივაღწიეთ ამ გადამწყვეტ, გარდამტეხ მომენტს… ღმერთმა დალოცოს ისრაელი. ღმერთმა დალოცოს ამერიკა. ღმერთმა დალოცოს ჩვენი დიდი ალიანსი," — განაცხადა ნეთანიაჰუმ.

ცნობისთვის, ისრაელმა და ჰამასმა 8 ოქტომბერს აშშ-ის პრეზიდენტ დონალდ ტრამპის გეგმის პირველ ფაზაზე შეთანხმებას მიაღწიეს. გეგმა ცეცხლის შეწყვეტასა და მძევალთა გათავისუფლების შეთანხმებას ითვალისწინებს.

ტრამპმა მოლაპარაკებებზე ჯარედ კუშნერი და სპეციალური წარმომადგენელი სტივ უიტკოფი გაგზავნა, შეხვედრაზე ისრაელს ბენიამინ ნეთანიაჰუს ნდობით აღჭურვილი პირი, სტრატეგიული საკითხების მინისტრი რონ დერმერი წარმოადგენდა.

ღაზის ხელისუფლების ცნობით, 2023 წლის 7 ოქტომბრის ჰამასის თავდასხმიდან მოყოლებული, ისრაელის სამხედრო ოპერაციებმა 67 000-ზე მეტი ადამიანი იმსხვერპლა და სექტორის დიდი ნაწილი მიწასთანაა გასწორებული. ისრაელის ოფიციალური მონაცემებით, თავდასხმის დროს დაიღუპა დაახლოებით 1 200 ადამიანი, ხოლო 251 მძევლად წაიყვანეს ღაზაში. ამჟამად 48 მძევლიდან დაახლოებით 20-ის ცოცხლად ყოფნაა დადასტურებული.