იტალიელი ჟურნალისტი ჯაკომო ფერარა საქართველოში არ შემოუშვეს. ამის შესახებ ჟურნალისტმა სოციალურ ქსელში დაწერა და ვიდეოც გამოაქვეყნა.

ჟურნალისტის თქმით, მას საქართველოს საზღვარზე განუცხადეს, რომ 31 მარტს პროევროპულ აქციაზე 5000 ლარით დაჯარიმდა, რის გამოც საზღვრის გადაკვეთას ვერ შეძლებდა.

ჟურნალისტის თქმით, მისთვის ჯარიმის შესახებ არავის შეუტყობინებია.

"ორშაბათ დილას, სომხეთ–საქართველოს საზღვარზე ქართველმა პოლიციელებმა შემაჩერეს და მაცნობეს, რომ ჩემს სახელზე არსებობდა დაახლოებით 5,000 ლარის (~1,565 ევრო) ოდენობის ჯარიმა. გამაფრთხილეს, რომ თანხის გადაუხდელობის შემთხვევაში ქვეყანაში შესვლის უფლებას ვერ მივიღებდი.

ეს ინფორმაცია სრული შოკი იყო ჩემთვის. მსგავსი სანქციის შესახებ არასდროს არაფერი მიმიღია და არც წარსულში შევუჩერებივარ საქართველოს პოლიცია. სამი სხვადასხვა ოფიცრის დაკითხვის შემდეგ მითხრეს, რომ ჯარიმა თითქოსდა დაკავშირებული იყო ჩემს ყოფნასთან რუსთაველის გამზირზე, 31 მარტს", — დაწერა ფერარამ.

მიუხედავად ჟურნალისტის მხრიდან იმ ფაქტის ახსნისა, რომ ის რუსთაველის გამზირზე არა რაიმეს გასაპროტესტებლად, არამედ საკუთარი პროფესიული საქმიანობის შესასრულებლად იმყოფებოდა და ამის დამადასტურებელი დოკუმენტებიც წარადგინა, საზღვრის კვეთაზე მაინც უარი მიიღო. ჟურნალისტმა ჯარიმის გადახდაზე უარი თქვა.

"ამჯერად 4 ოქტომბრის ადგილობრივი არჩევნების გასაშუქებლად ჩამოვედი. იტალიურმა გაზეთმა La Ragione-მ ოფიციალურადაც კი აცნობა ცესკო-ს ჩემი აქ ყოფნის შესახებ. შესაბამისი დოკუმენტაცია პოლიციელებს ვაჩვენე — მათ ფოტო გადაუღეს, თუმცა მათი ერთადერთი ინტერესი თანხის დაუყოვნებლივ გადახდა იყო. როდესაც ჯარიმის გადახდაზე უარი ვთქვი, მოვითხოვე პასპორტის დაბრუნება. დაახლოებით ორ საათში დამიბრუნეს, რის შემდეგაც მომცეს დოკუმენტი, სადაც ეწერა, რომ ათი დღე მქონდა გასაჩივრებისთვის.

თუმცა, საქართველოს ოფიციალური ვებგვერდი ქვეყნის გარეთ არ მუშაობს — არც VPN-ით — რაც შეუძლებელს ხდის, რომ საჩივარი თავად წარვადგინო.

ამ ფაქტის შესახებ უკვე შევატყობინე საქართველოში იტალიის საელჩოს და ჟურნალისტთა საერთაშორისო ფედერაციას", — დაწერა ჟურნალისტმა.