"თვითონ მოვიდა. ითხოვა, გერმანიის კონკრეტული ორგანიზაციები NGO-ებს რომ დავაფინანსებთ, [გრანტების კანონიდან] გაგვათავისუფლეთო. ვუთხარით, რომ ვერ გავაკეთებთ გამონაკლისებს," — IPN-ის ცნობით, ასე უპასუხა ოცნების ხელისუფლების მთავრობის ადმინისტრაციის უფროსმა, ლევან ჟორჟოლიანმა ჟურნალისტების შეკითხვას, რომელიც მასსა და საქართველოში გერმანიის ელჩს, პეტერ ფიშერს შორის გამართულ შეხვედრას შეეხებოდა.

ლევან ჟორჟოლიანი ამტკიცებს, რომ ადმინისტრაციაში ელჩი თავად არ დაუბარებიათ.

"თვითონ მოვიდა. ითხოვა, ჩვენ, გერმანიის კონკრეტული ორგანიზაციები "ენჯეოებს" რომ დავაფინანსებთ, გაგვათავისუფლეთო. ჩვენ ვუთხარით, რომ კანონი ყველა ქვეყანაზე ვრცელდება, ყველა უცხოურ დაფინანსებაზე, ვერ გავაკეთებთ გამონაკლისებს, ინკლუზიური კანონმდებლობა გვაქვს და დისკრიმინაციას არ ექვემდებარება. [მთავრობის ადმინისტრაციაში] თვითონ მოვიდა, ჩვენ არ დაგვიბარებია. საგარეოში მის დაბარებას ჰქონდა წინაპირობები, განცხადებები, ქმედებები. მას აუხსნა საგარეო საქმეთა სამინისტრომ, რაში მდგომარეობს დაბარების მიზეზები. ძალიან კარგად იცის. ჩვენ ვისაუბრეთ გრანტების შესახებ. შეხვედრას მე და ჩემი მოადგილე ვესწრებოდით," — თქვა ოცნების ხელისუფლების მთავრობის ადმინისტრაციის უფროსმა.

ოცნების ხელისუფლების მთავრობის ადმინისტრაციის უფროსი ლევან ჟორჟოლიანი გერმანიის ფედერაციული რესპუბლიკის საგანგებო და სრულუფლებიან ელჩს საქართველოში, პეტერ ფიშერს გუშინ, 25 სექტემბერს შეხვდა. ადმინისტრაციის ცნობით, შეხვედრაზე განიხილეს ორ ქვეყანას შორის ურთიერთობების ბოლო პერიოდის დინამიკა, ოცნების ხელისუფლების საგარეო უწყებაში დიპლომატის დაბარება და გრანტების შესახებ კანონი.