შალვა პაპუაშვილის განცხადებით, 4 ოქტომბრის აქციაზე ძალადობის ფაქტების დაფიქსირების შემთხვევაში პასუხისმგებლობას ევროკომისიას აკისრებს. პაპუაშვილმა ასევე დასძინა, რომ ის "ყურს არ უჯერებდა" როდესაც მოისმინა ევროკომისიის სპიკერის კომენტარი 4 ოქტომბერთან დაკავშირებით.

"გამოდის ევროკომისიის სპიკერი და კითხვაზე 4 ოქტომბერთან დაკავშირებით, ნაცვლად იმისა, რომ ჩვენ ვისმენდეთ — არჩევნების დღეა, მნიშვნელოვანი არის, რომ ყველამ მიიღოს მონაწილეობა, ყველა მივიდეს არჩევნებზე, ნაცვლად ამისა ვისმენთ, ჩემს ყურს არ ვუჯერებდი, როდესაც გეოგრაფიული ბრიუსელიდან გვესმოდა, რომ ეს კონკრეტული სპიკერი სოლიდარობას უცხადებს ლევან ხაბეიშვილის და ნაციონალური მოძრაობის მიერ 4 ოქტომბერს დაანონსებული დამხობის აქციას.

აბსოლუტური ღირებულებითი კატასტროფა არის, რაც ჩვენ ამ სიტყვებში ამოვიკითხეთ, ეს არის პირდაპირი პასუხისმგებლობის გაზიარება იმ შესაძლო ძალადობაზე, რაც ნაც. მოძრაობის დაორგანიზებულ აქციიდან იქნება. მე მინდა, რომ ეს გუშინდელი განცხადება კარგად დაიმახსოვროს ყველა ქართველმა და კარგად დაიმახსოვროს ყველა უცხოელმა — 4 ოქტომბერს, თუ კი იქნება რაიმე ძალადობა, ვინმე თუ ერთ ქვასაც გაისვრის პოლიციის მიმართულებით, აღარ ვსაუბრობ მოლოტოვის კოქტეილებზე და რაღაცებზე... ერთი ფაქტიც, თუ იქნება ძალადობის ამ ძალადობაზე პასუხისმგებლობა გაზიარებული აქვს გუშინდელი განცხადებით ევროკომისიას მისი პრესსპიკერი სახით," — თქვა პაპუაშვილმა.

გუშინ, ევროკომისიის სპიკერმა საგარეო ურთიერთობათა და უსაფრთხოების პოლიტიკის საკითხებში, ანიტა ჰიპერმა 4 ოქტომბრის აქციაზე "ფორმულასთან" საუბრისას განაცხადა, რომ ქართველ ხალხს სოლიდარობას უცხადებს.

"ქართველ ხალხს, ისევე, როგორც ყველას, აქვს დემონსტრაციის მშვიდობიანად მოწყობის უფლება, რომ გააგებინოს თავისი ხმა. ეს არის ნებისმიერი დემოკრატიის ბირთვი.

ჩვენ სოლიდარობას ვუცხადებთ ქართველ ხალხს, რომელიც გაბედულად და მშვიდობიანად გამოდის ქუჩებში და აწყობს დემონსტრაციებს ევროპული ღირებულებებისთვის, დემოკრატიისა და სიტყვის თავისუფლებისთვის. ევროკავშირი მხარს უჭერს დემოკრატიას და აყვავებას და ჩვენი გზავნილია საქართველოს ხელისუფლებისთვის, რომ უფლება მისცეს დემონსტრაციის და არ შეუშინდეს თავისუფალი მოქალაქეების პლურალიზმს, რომლებსაც სურთ, მათ ხმას მოუსმინონ," — განაცხადა ევროკომისიის სპიკერმა საგარეო ურთიერთობათა და უსაფრთხოების პოლიტიკის საკითხებში, ანიტა ჰიპერმა "ფორმულად" კითხვის საპასუხოდ, 4 ოქტომბერს დაგეგმილ საპროტესტო აქციასთან დაკავშირებით.