ამერიკის შეერთებული შტატები სისხლის სამართლის საერთაშორისო სასამართლოს წინააღმდეგ სანქციების დაწესებას განიხილავს. სანქციები, შესაძლოა, მიმდინარე კვირაშიც დაწესდეს. ამის შესახებ ინფორმაციას Reuters ავრცელებს.

ვაშინგტონს მიზანმიმართული სანქციები რამდენიმე პროკურორისა და მოსამართლის წინააღმდეგ უკვე დაწესებული აქვს, მაგრამ თავად სასამართლოს "სუბიექტის სანქციების" სიაში შეყვანა მნიშვნელოვანი ნაბიჯი იქნება.

Reuters-ის ექვსი ანონიმური წყაროს ცნობით, საქმე სენსიტიურ დიპლომატიურ საკითხს ეხება, რომლის შესახებაც საჯაროდ არაფერი გამოცხადებულა, შესაბამისად, ასეთი სანქციების შესახებ გადაწყვეტილება მალე უნდა მიიღონ. ერთმა წყარომ აღნიშნა, რომ სასამართლოს თანამშრომლებმა უკვე ჩაატარეს საგანგებო შიდა შეხვედრები, რათა შესაძლო სანქციების გავლენა განეხილათ. ორი სხვა წყაროს ინფორმაციით, შეხვედრები სასამართლოს წევრი ქვეყნების დიპლომატებს შორისაც გაიმართა.

აშშ-ის სახელმწიფო დეპარტამენტის წარმომადგენელმა სასამართლო აშშ-სა და ისრაელის წარმომადგენლებზე მისი "გამოგონილი იურისდიქციის" მტკიცებაში დაადანაშაულა და განაცხადა, რომ ვაშინგტონი დამატებით ნაბიჯებს გადადგამს, თუმცა არ დაუკონკრეტებია, რას მოიცავს ეს.

"სასამართლოს აქვს შესაძლებლობა შეცვალოს კურსი მნიშვნელოვანი და შესაბამისი სტრუქტურული ცვლილებების გზით. აშშ გადადგამს დამატებით ნაბიჯებს ჩვენი მამაცი სამხედროებისა და სხვების დასაცავად, სანამ საერთაშორისო სისხლის სამართლის სასამართლო საფრთხეს უქმნის ჩვენს ეროვნულ ინტერესებს," — განაცხადა სპიკერმა.

ცნობისთვის, სისხლის სამართლის საერთაშორისო სასამართლო 2002 წელს ხელშეკრულებით დაფუძნდა, რომელიც მას გენოციდის, კაცობრიობის წინააღმდეგ ჩადენილი დანაშაულებისა და ომის დანაშაულების გამოსაძიებლად იურისდიქციას ანიჭებს — იმ შემთხვევაში, თუ დანაშაულები ჩადენილია წევრი სახელმწიფოს მოქალაქის მიერ ან მისი ტერიტორიის ფარგლებში.

ისრაელი და აშშ სისხლის სამართლის საერთაშორისო სასამართლოს წევრები არ არიან. სასამართლო აღიარებს პალესტინას წევრ სახელმწიფოდ და მიიჩნევს, რომ მას პალესტინის ტერიტორიაზე განხორციელებული ქმედებების გამოსაძიებლად იურისდიქციას აძლევს. ისრაელი და აშშ ამას უარყოფენ.

თებერვალში თეთრმა სახლმა სანქციები დაუწესა სასამართლოს მთავარ პროკურორს, ქარიმ ხანს, რომელმაც ნეთანიაჰუსა და გალანტის დაკავების ორდერები მოითხოვა. ხანი, ამჟამად, მის წინააღმდეგ სექსუალურ დისკრედიტაციის ბრალდებებზე დაწყებული გამოძიების გამო, შვებულებაშია. ქერიმ ხანი ამ ბრალდებებს უარყოფს.