"პროპაგანდის მეგაფონად" წოდებული ქართული მაუწყებლის მფლობელი კომპანია ლონდონშია" — ასე ჰქვია The Guardian-ის სტატიას, რომელშიც "TV იმედის" პრორუსულ და ანტიდასავლურ პროპაგანდაზეა საუბარი.

გამოცემის ინფორმაციით, ევროკავშირის საგარეო საქმეთა სამსახურის დეზინფორმაციის მონიტორინგის განყოფილება "TV იმედს" "საქართველოს ევროკავშირისაკენ მისწრაფებების დამანგრეველი პროპაგანდის მეგაფონად" მოიხსენიებს. თავის მხრივ, "TV იმედი" კი დეზინფორმაციის მონიტორინგის ჯგუფს ფაქტობრივი უზუსტობების და სარედაქციო ხაზის არასწორ ინტერპრეტაციაში სდებს ბრალს.

"ლონდონის ცენტრში, ბელგრეივიას პონტის ქუჩაზე, ელეგანტურ ედვარდიანული სტილის სახლის პირველ სართულზე, რომლის ქვემოთაც ღვინის მაღაზია Jeroboams-ის მწვანე ტენტია, მდებარეობს ოფისი. გარედან იდენტიფიცირება თითქმის შეუძლებელია — მხოლოდ პატარა წარწერაა ზარზე. როცა მიმდინარე კვირაში კარზე ზარი დავრეკეთ, არავინ გააღო.

ეს არის Hunnewell Partners-ის იურიდიული მისამართი, რომელიც საკუთარ თავს ახასიათებს, როგორც "კერძო კაპიტალისა და სასამართლო დავების დაფინანსების ფირმას".

კომპანია ასევე არის ტელეკომპანია "TV იმედის" მფლობელი — მაუწყებლისა, რომელსაც ევროკავშირის საგარეო საქმეთა სამსახურის დეზინფორმაციის მონიტორინგის განყოფილება "საქართველოს ევროკავშირისაკენ მისწრაფებების დამანგრეველ პროპაგანდის მეგაფონად" მოიხსენიებს. მათივე შეფასებით, "იმედი" მმართველი პარტიის ყველაზე ძლიერი პროპაგანდისტული მანქანაა, რომელიც დაჟინებით ავრცელებს ანტიდასავლურ რიტორიკას და იმეორებს კრემლის სტილის დეზინფორმაციას.

Hunnewell Partners აცხადებს, რომ "TV იმედი-ის" აქტივების მხოლოდ მცირე ნაწილს ფლობს და არხს სარედაქციო დამოუკიდებლობა აქვს. თავის მხრივ, "TV იმედი" ევროკავშირის დეზინფორმაციის მონიტორინგის ჯგუფს ბრალს სდებს ფაქტობრივი უზუსტობების და სარედაქციო ხაზის არასწორ ინტერპრეტაციაში. არხი ანტიდასავლურობას და პრორუსულობას უარყოფს," — აღნიშნულია სტატიაში.

The Guardian-ის შეფასებით, საქართველოს ისტორიის გადამწყვეტ მომენტში "TV იმედი" უარყოფით როლს თამაშობს, ხელს უწყობს იმ რეჟიმის გამაგრებას, რომელსაც არასამთავრობო ორგანიზაციები და დასავლეთის მთავრობები — მათ შორის, აშშ, რომელმაც ბიძინა ივანიშვილს სანქციები დაუწესა — უფრო და უფრო ავტორიტარულად აფასებენ.

გაერთიანებულ სამეფოში სხვადასხვა პოლიტიკური პარტიის წევრებმა, მათ შორის ლეიბორისტმა დეპუტატმა ბლერ მაკდუგალმა, რომელიც ახლახან დაინიშნა მინისტრად, მთავრობას მოუწოდა კონკრეტული ნაბიჯები გადადგას.

ბრიტანელი პარლამენტარი, ჯეიმს მაკკლირი აცხადებს, რომ უკვე თვეებია დიდი ბრიტანეთისგან მოითხოვს, რომ ივანიშვილს, მისი გარემოცვას და "TV იმედის" მფლობელ ირაკლი რუხაძეს სანქციები დაუწესდეთ.

"Hunnewell Partners-ის კონტროლის ქვეშ "TV იმედი" გადაიქცა ქართული ოცნების პროპაგანდისტულ იარაღად, რომელიც იმეორებს პრორუსულ გზავნილებს და ესხმის თავს დემოკრატიულ ოპოზიციას. ამიტომაც მე თვეებია მოვითხოვ მთავრობისგან, რომ დააწესოს სანქციები ბიძინა ივანიშვილსა და მის ახლობლებზე, მათ შორის ირაკლი რუხაძეზე, რომელიც Hunnewell Partners-ის თანადამფუძნებელია," — აცხადებს ჯეიმს მაკკლირი.