ცნობილმა ამერიკელმა მომღერალმა, კომპოზიტორმა და პროდიუსერმა, ფინეას ო'კონელმა, ასევე პოპულარულ ავტორ-შემსრულებელთან, Ashe-თან ერთად, სუპერჯგუფი [ჯგუფი, რომელსაც უკვე წარმატებული სოლო შემსრულებლები აყალიბებენ] შექმნა. ჯგუფმა The Favors სულ ახლახან სადებიუტო ალბომიც, სახელწოდებით The Dream (სიზმარი), გამოუშვა. ჩანაწერში 12 სიმღერაა გაერთიანებული. ოფიციალური ანოტაციის მიხედვით, ესაა "თავისუფალი პროექტი, რომელიც 70-იანების პოპის სითბოსა და ატმოსფეროს აცოცხლებს".

"ყველაფერი დაიწყო დრამებით, ელექტროპიანინოთი, გიტარით, ბასით და ჩემი და Ashe-ის ხმებით", — ჰყვება ფინეასი, — "ჩანაწერზე ასე მუშაობა ყველა მუსიკოსის ოცნებაა. არადა, ცოცხალ შესრულებას ერთად იშვიათადღა იწერენ, ასე რომ, ეს ძალიან რომანტიკული და სახალისო პროცესი აღმოჩნდა. შედეგი კი ნამდვილად თავიდან ბოლომდე მოსასმენი ალბომია, რომელსაც მეგობრებთან ერთად საჭმლის კეთებისას ჩართავ და მიჰყვები".

Ashe კი ამატებს, რომ სურს, მსმენელმა ამ ალბომით "ერთდროულად იგრძნოს სითბო, ჟრუანტელი და სევდა".

ფინეასი და Ashe

ფოტო: Alex G Harper

ფინეასი ამერიკელი პოპვარსკვლავის, ბილი აილიშის, ძმა და პროდიუსერია. აილიშის ყველა სიმღერის თანაავტორი სწორედ ის გახლავთ. რაც შეეხება Ashe-ს, რომლის ნამდვილი სახელი ეშლინ რეი უილსონია, იგი ფინეასის დიდი ხნის მეგობარია. მათ ერთად აქამდეც უმუშავიათ — ო'კონელი უილსონის 2019 წელს გამოშვებული ჰიტის, Moral of the Story-ის, პროდიუსერია. 2021 წელს მუსიკოსებმა ერთობლივად ჩაწერეს ასევე სიმღერა Till Forever Falls Apart.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...