თავდაცვის ყოფილი მინისტრის, ჯუანშერ ბურჭულაძის ადვოკატის, დიმიტრი ხაჩიძის ინფორმაციით, გუშინ დაკავებული ყოფილი მინისტრი კლინიკა "ჰელსიკორეში" იმყოფება და მას დღეს მოინახულებს. ამის შესახებ ინფორმაციას IPN ავრცელებს.

NEWS.On.ge კლინიკასთან დაკავშირებას შეეცადა, თუმცა "ჰელსიკორეს" საზოგადოებასთან ურთიერთობის სამსახურში, არც ემერჯენსი განყოფილებაში ჯუანშერ ბურჭულაძის შესახებ ინფორმაცია არ მიაწოდა.

"ჯანმრთელობის მდგომარეობა სტაბილურია, თუმცა, მას წოლითი რეჟიმი ჰქონდა, შესაბამისად, აგრძელებს ამ რეჟიმში ყოფნას.

რაც შეეხება დაკავებას, ეს ყველაფერი არასწორია, არასამართლიანია, მართლმსაჯულების მიზნებს არ ემსახურება. არაფერ კავშირში არ არის კორუფციასთან მისი დაკავება. როცა ვამბობ, რომ ეს არასწორია, არ შეესაბამება კანონს, ეს იმას ნიშნავს, რომ ის უდანაშაულოა. შესაბამისად, "ბრალდება", რომელიც ჯერ არ წარუდგენიათ, არასწორია. თავდაცვის მინისტრი იყო და რა თქმა უნდა, ბრძოლას აპირებს", — განაცხადა ადვოკატმა IPN-თან.

ჯუანშერ ბურჭულაძის დაკავების შესახებ ინფორმაცია სუს-მა გუშინ გაავრცელა. როგორც ადვოკატმა მედიასთან საუბრისას განაცხადა, მან საყოფაცხოვრებო პირობებში მსუბუქი ტვინის შერყევა მიიღო და წოლითი რეჟიმი ჰქონდა, რის გამოც, ბურჭულაძემ კლინიკაში გადაყვანა მოითხოვა.

თავდაცვის ყოფილი მინისტრისთვის ოფიციალურად ბრალი ჯერ არ წარუდგენიათ. ჯუანშერ ბურჭულაძე სამსახურებრივი უფლებამოსილების გადამეტებისა და ფულის გათეთრების ბრალდებით დააკავეს. მას 9-დან 12 წლამდე პატიმრობა ემუქრება.

ჯუანშერ ბურჭულაძის დაკავებამდე, გუშინ, 11 სექტემბერს ენმ-ს წევრი ლევან ხაბეიშვილი და კოალიცია ცვლილებისთვის წევრი მურთაზ ზოდელავა დააკავეს.