კახა კალაძე თავდაცვის ყოფილი მინისტრის, ჯუანშერ ბურჭულაძის დაკავებას ეხმაურება და განაცხადა, რომ "ქვეყანას დანის პირზე სიარული მოუწია" და ბიძინა ივანიშვილი საქართველოში კორუფციას ებრძვის.

"კორუფციასთან ბრძოლა და პრევენციული ღონისძიებების გატარება პრინციპულად მნიშვნელოვანია. რაც შეეხება ბურჭულაძის დაკავებას, რა თქმა უნდა, არ არის სასიამოვნო არც ჩემთვის, არც ჩემი თანაგუნდელებისთვის. მძიმე ფაქტია, როდესაც შენს თანაგუნდელს აკავებენ მაშინ, როდესაც ქვეყანას დანის პირზე სიარული მოუწია.

თავად პარტიის საპატიო თავმჯდომარემ ყველაფერი გადადო და იცით, როგორ ებრძვის იმ ბოროტებას, რომელიც ებრძვის საქართველოს, ჩვენს სამშობლოს. ამ პირობებში და ვითარებაში, როდესაც მსგავსი ფაქტები ხდება, ძალიან ცუდია," — განაცხადა კახა კალაძემ ჯუანშერ ბურჭულაძის დაკავებაზე.

11 სექტემბერს, თავდაცვის ყოფილი მინისტრი ჯუანშერ ბურჭულაძე სამსახურებრივი უფლებამოსილების გადამეტებისა და ფულის გათეთრების ბრალდებით დააკავეს. მას 9-დან 12 წლამდე პატიმრობა ემუქრება. პროკურატურამ დღევანდელ ბრიფინგზე განაცხადა, რომ ბურჭულაძისთვის აღმკვეთი ღონისძიების სახით პატიმრობას მოითხოვენ.