ტელეკომპანია რუსთავი 2–ის ინფორმაციით, ამავე ტელეარხის ჟურნალისტი, ელენე ფრიცხალაიშვილი აცხადებს, რომ 19 ივნისს, გამთენიისას, თბილისის აეროპორტში მომხდარ იცნიდენტზე შსს–ს მიერ გავრცელებული ინფორმაცია რეალურ სურათს არ ასახავს.

როგორც ელენე ფირცხალაიშვილი ამბობს, სამინისტროს მიერ გავრცელებულ ვიდეომასალას ხმა არ ახლავს და შესაბამისად, არც ინციდენტის დაწყების მომენტია ასახული. მისი თქმით, ჟურნალისტსა და ოპერატორს აეროპორტში მუშაობის დროს მიუახლოვდა უცნობი პირი და მათ სიტყვიერი შეურაცხყოფა მიაყენა, რაც ფიზიკურ დაპირისპირებაში გადაიზარდა.

შინაგან საქმეთა სამინისტროს ინფორმაციით, 19 ივნისს, თბილისის საერთაშორისო აეროპორტის მოსაცდელ დარბაზში, მას შემდეგ, რაც ტელეკომპანია რუსთავის 2-ის გადამღებმა ჯგუფმა პროფესიული საქმიანობა დაასრულა, აღნიშნული ტელეკომპანიის ოპერატორ გიორგი ცანავას ალექსანდრე ს.-მ სიტყვიერი შეურაცხყოფა მიაყენა და შემთხვევის ადგილს გაეცალა. გამოძიებით დადგინდა, რომ მას გიორგი ცაავას დაედევნა და ფიზიკური შეურაცხყოფა მიაყენა, რის შემდეგაც მათ შორის სიტყვიერი და ფიზიკური დაპირისპირება დაიწყო.

შსს–ს განცხადებით, ცემის ფაქტზე გამოვლენილია ალექსანდრე მ.–ს თანმხლები ქალი:

"კონფლიქტის ადგილზე ამ დროს იმყოფებოდნენ ტელეკომპანია „რუსთავი 2“-ის ჟურნალისტი და საქართველოს პარლამენტის ერთ-ერთი წევრი. ამ უკანასკნელის განცხადებით, როდესაც იგი მობილური ტელეფონით ცდილობდა კონფლიქტის გადაღებას, ალექსანდრე ს.-ს თანმხლებმა თამარ ლ.-მ, პროტესტის ნიშნად, მას სიტყვიერი და ფიზიკური შეურაცხყოფა მიაყენა. პარლამენტარმა სამედიცინო დახმარებაზე უარი განაცხადა".

სამართალდამცველებმა ცემის ფაქტზე 1970 წელს დაბადებული თამარ ლ. გამოავლინეს. რაც შეეხება გიორგი ცაავას და ალექსანდრე ს.-ს, ორივე პირი გამოკითხულია და წინასწარი მონაცემებით, მათ ერთმანეთის მიმართ პრეტენზია არ გააჩნიათ.

აღნიშნულ ფაქტთან დაკავშირებით გამოძიება სსკ-ს 125-ე მუხლით (ცემა) მიმდინარეობს.

რუსთავი 2–ის გენერალურმა დირექტორმა ნიკა გვარამიამ შსს–სგან გამოძიების დაწყება ჟურნალისტურ საქმიანობაში ხელშეშლის მუხლით მოითხოვა.