"კომპიუტერის გენიოსად" ცნობილი იტალიელი მოზარდი, რომელიც 2006 წელს ლეიკემიით გარდაიცვალა, კათოლიკე ეკლესიამ წმინდანად შერაცხა. ამდენად, 15 წლის ასაკში გარდაცვლილი კარლო აკუტისი პირველი მილენიალი წმინდანი გახდა.

ლონდონში მცხოვრებ იტალიურ ოჯახში დაბადებული აკუტისი ტექნოლოგიური უნარ-ჩვევებით გამოირჩეოდა — მან შექმნა ვებგვერდი, სადაც ევქარისტიული "სასწაულების" ისტორია იყო განთავსებული. ვატიკანის ცნობით, ვებგვერდით ათასობით ადამიანმა ისარგებლა, აკუტისს კი ამან "ღმერთის ინფლუენსერის" სახელიც მოუტანა.

იტალიის ქალაქ ასიზიში, აკლდამაში დასვენებული მოზარდის ცხედარს წმინდანისთვის უჩვეულო სამოსიც აცვია: სვიტრი, ჯინსები და სპორტული ფეხსაცმელი.

კარლო აკუტისის აკლდამა

ფოტო: Catholic Herald

კარლო აკუტისის ბეატიფიკაცია, ანუ ნეტარად შერაცხვა, ჯერ კიდევ 2020 წელს მოხდა — მას შემდეგ, რაც, ეკლესიის მტკიცებით, მის სახელზე ლოცვამ ბრაზილიელი ბიჭი იშვიათი დაავადებისგან განკურნა. საეკლესიო კანონიკით, წმინდანად შერაცხვისთვის, საჭირო იყო კანდიდატის მიერ მოხდენილი კიდევ ერთი "სასწაულის" არსებობის დადასტურება. მას მერე კი, რაც ეს მოხდა, გასული წლის ივლისში, რომის წინა პაპმა, ფრანცისკემ, აკუტისის წმინდანად შერაცხვა ბრძანა.

ფოტო: Alamy

მოზარდის კანონიზაციის ცერემონია, რომელსაც კათოლიკე ეკლესიის ახალი მეთაური, პაპი ლეო XIV უძღვებოდა, სულ ახლახან, 7 სექტემბერს შედგა ვატიკანში. ცერემონიაზე დასასწრებად, წმინდა პეტრეს მოედანზე ათასობით ადამიანი შეიკრიბა. მათ შორის იყო ბიჭის დედა, ანტონია სალცანო აკუტისი, რომლის თქმითაც, ოჯახში კარლო პირველი წმინდანი არ არის — მე-19 და მე-20 საუკუნეებში მათი ორი წინაპარი, რომლებიც მონაზვნები იყვნენ, ასევე შერაცხეს წმინდანებად.

ვატიკანში შეკრებილებს შორის იყვნენ ახალგაზრდებიც, რომლებიც, მათივე თქმით, კარლოსთან განსაკუთრებულ "სიახლოვეს" გრძნობენ.

"ჩვენნაირი იყო, ჩვეულებრივი მოზარდი ბიჭი, რომელსაც მსგავსი ინტერესები ჰქონდა", — აღნიშნავს ერთ-ერთი, — "სპორტი და ინტერნეტი უყვარდა. ასე რომ, იგი თანამედროვე ახალგაზრდობას წარმოადგენს".