ავღანეთის აღმოსავლეთში მომხდარ 6 მაგნიტუდის სიმძლავრის მიწისძვრას სულ მცირე 622 ადამიანი შეეწირა და 1 500-ზე მეტი დაშავდა, ამის შესახებ ინფორმაციას ოფიციალურ პირებზე დაყრდნობით Reuters ავრცელებს.

თალიბანის მიერ კონტროლირებადმა შინაგან საქმეთა სამინისტრომ დაადასტურა მსხვერპლის რაოდენობა, მაშინ როცა უფრო ადრე ავღანეთის სახელმწიფო მაუწყებელმა (RTA) დაახლოებით 500 დაღუპულის შესახებ გაავრცელა ინფორმაცია.

ქაბულში ჯანდაცვის უწყებამ აღნიშნა, რომ მაშველები ცდილობენ, მიაღწიონ დაშორებულ სოფლებში, რომლებიც მიწისძვრებისა და წყალდიდობების ისტორიით გამოირჩევა.

"მხოლოდ რამდენიმე კლინიკიდან მიღებულმა მონაცემებმა აჩვენა 400-ზე მეტი დაშავებული და ათეულობით დაღუპული," — განაცხადა სამინისტროს სპიკერმა შარაფათ ზამანმა და აღნიშნა, რომ მსხვერპლის რაოდენობა შესაძლოა კიდევ გაიზარდოს.

ჯანდაცვის სამინისტროს ცნობით, კუნარის პროვინციაში სამი სოფელი მთლიანად განადგურდა, ხოლო მრავალი სხვა სერიოზულად დაზიანდა.