ბელორუსის პრეზიდენტმა, ალექსანდრე ლუკაშენკომ ჩინურ საინფორმაციო სააგენტო "სინხუასთან" ინტერვიუში განაცხადა, რომ ბევრმა დასავლელმა პოლიტიკოსმა ჩინეთის პრეზიდენტის, სი ძინპინისგან უნდა ისწავლოს.

"მას აქვს ის, რაც ბევრმა დასავლელმა პოლიტიკოსმა უნდა ისწავლოს: პასუხისმგებლობა თავისი ხალხის წინაშე, სტრატეგიული აზროვნება და რკინის ნება", — თქვა ლუკაშენკომ.

ლუკაშენკომ ხაზგასმით აღნიშნა, რომ სი ძინპინი სტრატეგიულად ფიქრობს და ათწლეულების განმავლობაში წინ იყურება.

"დღევანდელ სრულიად არაპროგნოზირებად გარემოში ის თამამად იღებს ლიდერობას და არა მხოლოდ ჩინეთს, არამედ მთელ მსოფლიოს განვითარების მკაფიო და კონკრეტულ გზას სთავაზობს", — დასძინა მან.

ბელორუსის პრეზიდენტის თქმით, "მათგან განსხვავებით, ვინც ბომბებითა და სანქციებით "დემოკრატიის დამყარებას" ცდილობს, ჩინეთი აჩვენებს, რომ შესაძლებელია მშვიდობიანად და მშვიდად განვითარება, სხვა სახელმწიფოების პატივისცემით".

საერთო ჯამში, ლუკაშენკომ თქვა, რომ ბელორუსსა და ჩინეთს ერთმანეთთან ნდობისა და პატივისცემის უმაღლესი ხარისხი აკავშირებს. "ბელორუსისთვის, სი ძინპინი არა მხოლოდ საიმედო პარტნიორია, არამედ გულწრფელი მეგობარიც. მისი უპირობო მხარდაჭერის წყალობით, ბელორუს-ჩინეთის ურთიერთობებმა ისტორიაში ყოვლისმომცველი სტრატეგიული პარტნიორობის უმაღლეს დონეს მიაღწია", — აღნიშნა მან.

ლუკაშენკომ აღფრთოვანება გამოხატა ჩინეთის განვითარების ტემპითა და შედეგებით და ხაზი გაუსვა, რომ ის უკვე გახდა მსოფლიო ლიდერი სამრეწველო რობოტების წარმოებაში, უპილოტო მანქანებისა და სატვირთო მანქანების შემუშავებასა და ხელოვნური ინტელექტის განვითარებაში.

ბელარუსის პრეზიდენტმა გამოთქვა რწმენა, რომ მისი ამჟამინდელი ვიზიტი ჩინეთში შანხაის თანამშრომლობის ორგანიზაციის სამიტზე კიდევ ერთ შესაძლებლობას იძლევა სტრატეგიული პარტნიორობის გაღრმავებისთვის და ახალ იმპულსს აძლევს ბელორუს-ჩინეთის თანამშრომლობას სავაჭრო-ეკონომიკურ საკითხებში, ასევე ერთობლივი პროექტების ინტენსიფიკაციას მეცნიერებაში, ტექნოლოგიებსა და ინდუსტრიულ თანამშრომლობაში.

ცნობისათვის, შანხაის თანამშრომლობის ორგანიზაციის სამიტ ტიანძინში 31 აგვისტოდან 1 სექტემბრამდე გაიმართება.

სამიტში მონაწილეობის მისაღებად ტიანძინში ასევე ჩავიდნენ აზერბაიჯანის, სომხეთის, ყაზახეთის, ყირგიზეთის, ტაჯიკეთის, თურქმენეთის, უზბეკეთის და შანხაის თანამშრომლობის ორგანიზაციის სხვა წევრი ქვეყნების პრეზიდენტები. მიმდინარე სამიტი რიგით 25-ეა; შანხაის თანამშრომლობის ორგანიზაციის ლიდერების პირველი სამიტი ასევე ჩინეთში (შანხაი) 2001 წელს გაიმართა.

როგორც უკვე წერდა NEWS.On.ge, ჩინეთმა სტრატეგიული პარტნიორი საქართველო გამარჯვების აღლუმზე არ მიიწვია.