ერთიანი ნაციონალური მოძრაობის თავმჯდომარე თინა ბოკუჩავა და პარტიის პოლიტიკური მდივანი გიორგი ბარამიძე მოლდოვის პრეზიდენტს, მაია სანდუს და საგარეო მინისტრს მიჰაი პოპსოის შეხვდნენ. ამის შესახებ პარტიის ოფიციალურ ინფორმაციაშია აღნიშნული.

თინა ბოკუჩავას განცხადებით, აუცილებელია ძალისხმევის გაორმაგება საგარეო ფრონტზე იმისთვის, რომ საქართველო საერთაშორისო დღის წესრიგიდან არ მოიხსნას.

"ჩვენ შევხვდით, როგორც მაია სანდუს, ასევე საგარეო საქმეთა მინისტრს. მოლდოვის დამოუკიდებლობის დღის აღსანიშნავად და ქვეყნის ევროინტეგრაციის მხარდასაჭერად აქ, კიშინიოვში იმყოფებიან ვაიმარის სამკუთხედის სამივე ლიდერები — პრეზიდენტი მაკრონი, პრემიერმინისტრი დონლად ტუსკი და კანცლერი მერცი, რაც ადასტურებს იმას, რომ ევროკავშირი ყველა ძალისხმევას დებს მოლდოვის ევროკავშირში გაწევრიანებაში, რომელიც არის მთავარი გარანტი მშვიდობის, თავისუფლების და ევროპული კეთილდღეობის ევროპულ სივრცეში. ჩვენ დღეს ამ შესაძლებლობას გვართმევს ივანიშვილის კრიმინალური ბანდა მაშინ, როდესაც ევროპაში ჩვენც გველოდებიან, ქართველ ხალხსაც ელოდებიან და ეს შესაძლებლობა ხელის გულზე დევს, ამიტომაც აუცილებელია გავაორმაგოთ ძალისხმევა საგარეო ფრონტზე იმისთვის, რომ საქართველო არ მოიხსნას საერთაშორისო დღის წესრიგიდან და ასევე ქვეყნის შიგნით და ამ პროცესების სინქრონიზაციით მოვიტანოთ რეჟიმის ცვლილება და დავაბრუნოთ საქართველო ევროინტეგრაციის გზაზე," — განაცხადა თინა ბოკუჩავამ.

გიორგი ბარამიძის განცხადებით, "რაც შეუძლია მოლდოვას, შეუძლია საქართველოსაც, თუმცა ჩვენი ქვეყნის ევროპულ მომავალს ხელს უშლის პუტინის მეხუთე კოლონა და ივანიშვილის კრიმინალური ბანდა"

"ნაციონალური მოძრაობის თავმჯდომარე თინა ბოკუჩავასთან ერთად 2 დღეა ვართ მოლდოვაში. გუშინ, დავესწარით ისტორიულ მოვლენას, როდესაც ვაიმარის სამეულის ლიდერები ულოცავდნენ მოლდოველ ხალხს ევროპულ გზაზე პროგრესს. დღეს გვქონდა პატივი შევხვედროდით მოლდოვის პრეზიდენტს და საგარეო საქმეთა მინისტრს და ეს ძალიან მნიშვნელოვანია ჩვენი მეგობარი მოლდოვისთვის. რაც შეუძლია მოლდოვას, რა თქმა უნდა, შეუძლია საქართველოს, მაგრამ, სამწუხაროდ, რასაც ახერხებს მოლდოვა საქართველო ვერ
ახერხებს იმის გამო, რომ ჩვენი ქვეყანა, პრაქტიკულად, ხელში აქვს ჩაგდებული
პუტინის მეხუთე კოლონას მოღალატეთა და კრიმინალთა ბანდას, რომელიც ცდილობს
ნაცვლად ევროკავშირში ინტეგრაციისა საქართველო დააბრუნოს რუსეთის
ექსკლუზიური გავლენის ორბიტაზე, რასაც ქართველი ხალხი, დარწმუნებული ვარ, არ
მოითმენს, ამიტომ ჩვენი ამოცანაა ყველამ ერთად ამ მოღალატეთა და კრიმინალთა
ბანდისგან ჩვენი სამშობლო — საქართველო გავათავისუფლოთ," — განაცხადა გიორგი
ბარამიძემ