პროევროპული აქციების დროს ნარკოდანაშაულის ბრალდებით დაკავებული ანასტასია ზინოვკინასა და არტემ გრიბულის საქმის ერთ-ერთი ფიგურანტი მოწმე პოლიციელი ირაკლი მუხათგვერდელი ცეცხლსასროლი იარაღიდან სროლისთვის დააკავეს და სასამართლომ გირაოთი გაათავისუფლა. ინფორმაციას "პუბლიკა" ავრცელებს.

პროკურატურაში გამოცემას უთხრეს, რომ უწყების შუამდგომლობის საფუძველზე მას აღკვეთის ღონისძიების სახით პატიმრობა შეეფარდა, თუმცა წინასასამართლო სხდომაზე პატიმრობის გირაოთი შეცვლისთვის დაცვის მხარემ იშუამდგომლა, რაც სასამართლომ გაიზიარა.

"წინასასამართლო სხდომაზე დაცვის მხარემ იშუამდგომლა პატიმრობის გირაოთი შეცვლის თაობაზე, რაც სასამართლომ დააკმაყოფილა და ბრალდებულს შეეფარდა გირაო 10 000 ლარის ოდენობით. დღეის მდგომარეობით საქმე განიხილება არსებითად," — უთხრეს "პუბლიკას" პროკურატურაში.

გამოცემას უწყებაში განუცხადეს, რომ პოლიციელმა მუხათგვერდელმა იარაღიდან რამდენჯერმე გაისროლა.

"გამოძიებით დადგინდა, რომ 2025 წლის 24 მაისს, თბილისში, ბრალდებული გადაადგილდებოდა ავტომანქანით, რა დროსაც მის საკუთრებაში არსებული ცეცხლსასროლი იარაღიდან გზის საპირისპირო სამოძრაო ზოლის მიმართულებით რამდენჯერმე გაისროლა," — უთხრეს "პუბლიკას" პროკურატურაში.

მუხათგვერდელს ბრალი სისხლის სამართლის კოდექსის 239-ე მუხლის მე-3 ნაწილით წარედგინა, რაც ხულიგნობას გულისხმობს და 4-დან 7 წლამდე თავისუფლების აღკვეთას ითვალისწინებს.

ბრალდებული პოლიციელი შინაგან საქმეთა სამინისტროს რიგებში აღარ არის. "პუბლიკას" უწყებაში უთხრეს, რომ მუხათგვერდელი აღნიშნული ფაქტის შემდეგ შსს-ში აღარ მუშაობს.

14 აგვისტოს ანასტასია ზინოვკინა პროცესზე მოწმის სახით დაიკითხა, სადაც თქვა, რომ პოლიციელი ირაკლი მუხათგვერდელი გაუპატიურებით ემუქრებოდა.

"მემუქრებოდა გაუპატიურებით, ხელს იკიდებდა შარვლის ელვა შესაკრავზე," — თქვა მან პროცესზე.

ასევე იხილეთ: