"ეს იყო დემონსტრაციული და ცინიკური რუსული დარტყმა. მათ იციან, რომ დღეს ვაშინგტონში იმართება შეხვედრა, რომელზეც ომის დასრულების საკითხი იქნება განხილული," — ასე ეხმაურება უკრაინის პრეზიდენტი ვოლოდიმირ ზელენსკი რუსების მიერ ხარკოვზე განხორციელებულ თავდახმას, რომელსაც 7 ადამიანი ემსხვერპლა, 20 კი დაშავდა. მათ შორის არიან ბავშვებიც.

• რუსებმა ხარკოვი დაბომბეს — მსხვერპლი 7-მდე გაიზარდა, რის გამოც ქალაქში 18 აგვისტო გლოვის დღედ გამოცხადდა

ზელენსკის განცხადებით, პუტინი დემონსტრაციულ მკვლელობებს ჩაიდენს უკრაინასა და ევროპაზე ზეწოლის შესანარჩუნებლად და დიპლომატიური ძალისხმევის შესამცირებლად.

"ეს იყო დემონსტრაციული და ცინიკური რუსული დარტყმა. მათ იციან, რომ დღეს ვაშინგტონში იმართება შეხვედრა, რომელზეც ომის დასრულების საკითხი იქნება განხილული.

პრეზიდენტ ტრამპთან ერთად ძირითად საკითხებზე ვისაუბრებთ. საუბარში უკრაინასთან ერთად მონაწილეობას მიიღებენ გაერთიანებული სამეფოს, საფრანგეთის, გერმანიის, იტალიის, ფინეთის, ევროკავშირისა და NATO-ს ლიდერები.

ყველა ღირსეულ მშვიდობასა და ნამდვილ უსაფრთხოებას ეძებს. და სწორედ ამ მომენტში რუსები ხარკოვს, ზაპოროჟიეს, სუმის ოლქსა და ოდესას ესხმის თავს, ანადგურებენ საცხოვრებელ შენობებსა და ჩვენს სამოქალაქო ინფრასტრუქტურას.

რუსები განზრახ კლავენ ადამიანებს, განსაკუთრებით ბავშვებს. ამ დროისთვის, ხარკოვში დრონის დარტყმის შედეგად შვიდი ადამიანი დაიღუპა, მათ შორის ყველაზე პატარა გოგონაა, რომელიც მხოლოდ წლინახევრისაა, და ათობით ადამიანი დაშავდა, მათ შორის ბავშვები.

ზაპოროჟიეში სარაკეტო დარტყმების შედეგად 20 ადამიანი დაშავდა და სამი დაიღუპა. ვუსამძიმრებ ყველა მსხვერპლის ოჯახს და ახლობლებს.

ასევე, ოდესაში აზერბაიჯანული კომპანიის საკუთრებაში არსებულ ენერგეტიკულ ობიექტზე რუსეთის მიერ განზრახ განხორციელებული დარტყმა მოხდა, რაც იმაზე მიანიშნებს, რომ ეს იყო თავდასხმა არა მხოლოდ ჩვენზე, არამედ ჩვენს ურთიერთობებსა და ენერგეტიკულ უსაფრთხოებაზე.

რუსული საომარი მანქანა ყველაფრის მიუხედავად აგრძელებს სიცოცხლის განადგურებას. პუტინი დემონსტრაციულ მკვლელობებს ჩაიდენს უკრაინასა და ევროპაზე ზეწოლის შესანარჩუნებლად, ასევე დიპლომატიური ძალისხმევის შესამცირებლად. სწორედ ამიტომ ვეძებთ დახმარებას მკვლელობების შესაჩერებლად. სწორედ ამიტომ არის საჭირო საიმედო უსაფრთხოების გარანტიები. სწორედ ამიტომ არ უნდა დაჯილდოვდეს რუსეთი ამ ომში მონაწილეობისთვის. ომი უნდა დასრულდეს. და სწორედ მოსკოვმა უნდა გაიგოს სიტყვა: "შეჩერდი", — წერს ზელენსკი X-ზე.

რუსი ოკუპანტები ხარკოვში, საცხოვრებელ კორპუსს დრონებით თავს დაესხნენ, რასაც 7-მდე ადამიანი ემსხვერპლა, მათ შორის 2 ბავშვია.

რაც შეეხება დაშავებულებს, Ukrainskaya Pravda-ს ცნობით, მათი რაოდენობა 20-მდე გაიზარდა, მათ შორის 6 ბავშვია.

ქალაქის მერის, იგორ ტერეხოვის განცხადებით, 18 აგვისტო ხარკოვში გლოვის დღედ გამოცხადდა.