9 დიდი ბრენდი, ერთი მიზანი: საქართველოს ბანკი, კავკასიის ბუნების ფონდთან (CNF) თანამშრომლობით ახალ კამპანიას ახორციელებს, მის ფარგლებში მოუწოდებს ბრენდებს, რომლებსაც ლოგოში ცხოველი ან ფრინველის სიმბოლო აქვთ გამოყენებული, აქტიურად ჩაერთონ გარემოსდაცვით აქტივობებში და წვლილი შეიტანონ ბუნების დაცვის პროცესში.

კამპანიას უკვე 9 პარტნიორი ჰყავს, მათ შორის ერთ-ერთი GT Motors-ის პორტფელში არსებული საერთაშორისო ბრენდი Ford Mustang-ია.

“ჩვენთვის პატივია ვიყოთ იმ კომპანიებს შორის, რომლებიც შეუერთდა ამ ინიციატივას და გვინდა, ჩვენი მონაწილეობით სხვებსაც მივცეთ მაგალითი. თანაც როგორი საამაყოა, როცა ისეთ ბრენდებზე გვაქვს საუბარი როგორიც არის Jaguar და Mustang.

ჩვენს პორტფელში არსებული საერთაშორისო ბრენდების სიმბოლიკა სრულიად ორგანულად ეხმიანება კამპანიის მთავარ გზავნილს —მართალია, Jaguar-სა და Mustang-ს ბრენდებად ჩამოყალიბების სრულიად სხვადასხვა ისტორია აქვს, მათ აერთიანებს ის, რომ ორივე ბრენდი სიმბოლურად გადმოსცემს იმ ძალასა და ენერგიას, რომელსაც ადამიანი ბუნებისგან იღებს“, — აღნიშნავს ელლა კამლაძე, GT Motors-ის მარკეტინგის ხელმძღვანელი.

Ford Mustang-ის ბრენდის სიმბოლო მორბენალი ცხენია, რომელიც ავტომანქანის ღრმა ამერიკულ მემკვიდრეობას ასახავს და თავისუფლების, მუდმივი მოძრაობის იდეას აერთიანებს.

“საქართველოს ბანკის და CNF-ის კამპანია იდეალურად ეხმიანება იმას, რისიც ჩვენ ღრმად გვწამს, რომ ბრენდის ძალა არ არის მხოლოდ ციფრებში გამოხატული ყოველწლიური შედეგები. GT Motors-ში სოციალური პასუხისმგებლობა ჩვენი საქმიანობის განუყოფელი ნაწილია.

ჩვენ გვჯერა, რომ პასუხისმგებლობიანი ბიზნესი ყოველთვის სცდება კომერციულ ნაწილს და საზოგადოებისთვის მეტად ღირებული და დასამახსოვრებელია. ეს არის მადლიერების ის ფორმა, რომლითაც ჩვენ, როგორც პასუხისმგებლობიან ბიზნესს გვაქვს საშუალება ბუნებას დავუბრუნოთ იმ სიკეთის მცირე ნაწილი, რომელსაც ის გვაძლევს. ბიზნესს დიდი ძალა აქვს და ამ საქმეში ერთი ძალიან პატარა აგურის დადებამაც კი შეიძლება განუსაზღვრელად დიდი სიკეთე მოიტანოს. ჩვენს შემთხვევაში კი მიგვაჩნია, რომ როცა ბრენდების მთავარი პათოსი მოძრაობაა, მიზანი სწორი გზით სვლა უნდა იყოს — სწორი გზა კი ნამდვილად ასეთ ინიციატივებზეა ორიენტირებული“, — აღნიშნავს ელლა კამლაძე, GT Motors-ის მარკეტინგის ხელმძღვანელი.

ინფორმაციისთვის, კამპანია კრეატიულ სააგენტო Leavingstone-თან თანამშრომლობით ხორციელდება.