დიდი ბრიტანეთის საელჩო თბილისში საფეხბურთო მატჩზე დასწრების მსურველ ბრიტანეთის მოქალაქეთათვის გაცემულ რჩევებთან დაკავშირებით განმარტავს, რომ ასეთი რჩევები მსოფლიოს მრავალი ქვეყნისთვის არსებობს.

საელჩოს ცნობით, მათ პრაქტიკული რჩევები გასცეს მათთვის, ვისაც სურს დაესწროს უელსსა და საქართველოს შორის საფეხბურთო მატჩს ექვს ოქტომბერს:

"ბრიტანეთის მოქალაქეებისთვის საზღვარგარეთ მგზავრობის შესახებ არსებული ინფორმაცია არის დოკუმენტი, რომელიც წარმოადგენს რეკომენდაციებსა და პრაქტიკულ რჩევებს. მისი მიზანია ბრიტანეთის მოქალაქეების უსაფრთხოება და მათი მხრიდან ადგილობრივი კანონმდებლობის და კულტურის უკეთ გაცნობა და პატივისცემა".

საელჩო აღნიშნავს, რომ მათ მიერ გამოქვეყნებულ რეკომენდაციებში, ხაზგასმული იყო ის ფაქტი, რომ ზოგადად თბილისში კრიმინალის დონე დაბალია.

"თბილისმა არაერთხელ წარმატებით უმასპინძლა სხვადასხვა საერთაშორისო სპორტულ ღონისძიებას და ამჯერადაც მოლოდინი გვაქვს, რომ ეს მატჩიც წარმატებით ჩაივლის. მოუთმენლად ველით უელსის გულშემატკივრების თბილისში ჩამოსვლას".

დიდი ბრიტანეთისა და ჩრდ. ირლანდიის გაერთიანებული სამეფო საქართველოში ჩასვლის მსურველ მოქალაქეებს სამოგზაურო რჩევებსა და გაფრთხილებებს აძლევს.