CBS-ის გვიანი შოუს დახურვას სხვა იუმორისტული გადაცემების წამყვანები და კომიკოსები ეხმაურებიან, ისინი სტივენ კოლბერს მხარდასაჭერად გადაცემაში ესტუმრნენ და წამყვანს სოლიდარობა გამოუცხადეს.

როგორც იცით, გასულ ხუთშაბათს, დონალდ ტრამპის სარჩელზე ხუმრობის შემდეგ, CBS-მა მოულოდნელი განცხადება გააკეთა და თქვა, რომ სტივენ კოლბერის გვიანი შოუს დახურვას გეგმავს, მათ მიზეზად "ფინანსური კრიზისი" დაასახელეს.

22 ივლისს გვიანი შოუ ერთიანობის ეპიცენტრად იქცა: ჯიმი ფელონი, სეთ მაიერსი, ჯონ სტიუარტი, ჯონ ოლივერი, ანდერსონ კუპერი, ენდი კოენი და სხვა წამყვანები სტივენ კოლბერის მხარდასაჭერად გამოჩნდნენ მას შემდეგ, რაც CBS-მა შოუს დახურვა გამოაცხადა — ბევრის ვარაუდით, გადაწყვეტილების უკან ფინანსებზე მეტად პოლიტიკური მოტივები დგას.

ფოტო: Los Angeles Times

"ზოგიერთი ადამიანი გადაცემის დახურვას ნამდვილ ტრაგედიად აღიქვამს, ამას სულაც არ ვეთანხმები, რადგან ჩვენ, არასდროს მიგვაჩნდა, რომ რამე უნდა შეგვეცვალა, გარდა იმისა, როგორ გრძნობდით თავს დღის ბოლოს, რაც, ვფიქრობ, ღირებული მიზანია", — თქვა კოლბერმა.

წამყვანმა დასძინა, რომ "გაუქმების კულტურამ ძალიან შეტოპა" და ვარაუდობს, რომ მანჰეტენზე მდებარე ედ სალივანის თეატრი — სადაც გვიანი შოუს ჩაწერა მიმდინარეობს — შესაძლოა, გადაცემის დახურვის შემდეგ "სათავსოდ" გადაკეთდეს.

აღსანიშნავია, რომ იუმორისტული გადაცემების წამყვანებმა კოლბერის მხარდაჭერასთან ერთად, დონალდ ტრამპიც გააშარჟეს. 22 ივლისს გასული გადაცემის სკეტჩში, წამყვანებთან ერთად, კარიკატურად ქცეული ტრამპი გამოჩნდა, რომელიც Paramount-ის ლოგოს ეხუტებოდა.

ფოტო: CBS

სკეტჩის ეს მონაკვეთი, Coldplay-ის კონცერტიდან ვირუსულად გავრცელებული ვიდეოს — რომელშიც კომპანიის დირექტორისა და ადამიანების რესურსების მენეჯერი ერთმანეთს ეხუტებოდნენ — იმიტაცია იყო.

აღსანიშნავია, რომ გადაცემის დახურვის შესახებ განცხადება ზუსტად ორი კვირის შემდეგ გაკეთდა, რაც CBS-ის მშობელი კომპანია Paramount პრეზიდენტ დონალდ ტრამპთან 16 მილიონიან სარჩელზე შეთანხმდა, რომელიც ტრამპის 2024 წლის არჩევნებში კონკურენტ კამალა ჰარისთან CBS-ზე გასულ ინტერვიუს ეხებოდა.

ფოტო: Ryan Murphy

შეგახსენებთ, რომ ტრამპსა და Paramount-ს შორის შეთანხმება მას შემდეგ დაიდო, რაც ტრამპმა გასული წლის ოქტომბერში CBS-ს უჩივლა და განაცხადა, რომ ტელეარხმა გამიზნულად დაამონტაჟა მის საპრეზიდენტო კონკურენტ კამალა ჰარისთან ინტერვიუ, რომელიც საინფორმაციო პროგრამა 60 წუთში გავიდა, რათა "სასწორი დემოკრატიული პარტიის სასარგებლოდ გადაეხარა".

ჯერჯერობით უცნობია, რომელი გადაცემა ჩაანაცვლებს გვიან ღამეს. გადაცემის ბოლო ეპიზოდს მაყურებელი 2026 წლის მაისში, მომდევნო სეზონის დასრულების შემდეგ, იხილავს.