გიორგი გახარიას და მამუკა ხაზარაძის პარტიების თვითმმართველობის არჩევნებში მონაწილეობის მიუხედავად, ოცნების ხელისუფლება "გახარია საქართველოსთვის" და "კოალიცია ძლიერი საქართველოს" აკრძალვას აპირებს.

ამის შესახებ ოცნების პრემიერმა, ირაკლი კობახიძემ განაცხადა. მისი თქმით, პარტიების არაკონსტიტუციურად გამოცხადების თაობაზე გადაწყვეტილება შეიძლება მიიღოს ერთადერთმა ორგანომ, ეს არის საქართველოს საკონსტიტუციო სასამართლო და ოთხივე ოპოზიციური პარტია (ნაციონალური მოძრაობა, კოალიცია ცვლილებებისთვის, ლელო — ძლიერი საქართველო და გახარია — საქართველოსთვის) ერთი პოლიტიკური ძალა — კოლექტიური ნაცმოძრაობა და უცხოური აგენტურაა.

"პარტიებს ჩვენ ვერ გავაუქმებთ. პარტიების არაკონსტიტუციურად გამოცხადების თაობაზე გადაწყვეტილება შეიძლება მიიღოს ერთადერთმა ორგანომ, ეს არის საქართველოს საკონსტიტუციო სასამართლო. ჩვენ ოთხივე პარტიასთან დაკავშირებით მივმართავთ, იმიტომ, რომ ოთხივე პარტია არის ერთი პოლიტიკური ძალა, ეს არის კოლექტიური ნაცმოძრაობა, ეს არის უცხოური აგენტურა, რომელიც უკვე ამდენი წელია, კოლექტიურად 2003 წლიდან მოყოლებული ებრძვის საქართველოს ეროვნულ ინტერესებს", — განაცხადა კობახიძემ.

მიმდინარე წლის აპრილში, ოცნების ლიდერმა, მამუკა მდინარაძემ განაცხადა, რომ ოპოზიციურ პარტიებს თვითმმართველობის არჩევნებსი შემდეგ აკრძალავენ.

"მზად ვართ, რომ მიმდინარე წლის თვითმმართველობის არჩევნებზე აგენტურულ პარტიებს ქართველმა ხალხმა გასცეს საკადრისი პასუხი", — განაცხადა მამუკა მდინარაძემ.

მისი თქმით, ჯერ "სახელოვნად გაიმარჯვებენ, შემდეგ კი ფაქტებზე დაფუძნებულ კონსტიტუციურ სარჩელს მოამზადებენ" და "კოლექტიური ნაცმოძრაობას" აკრძალავენ.

მდინარაძის თქმით, "ოცნება" "კოლექტიურ ნაცმოძრაობას" 2025 წლის თვითმმართველობის არჩევნების შემდეგ აკრძალავს