სომხეთის ხელისუფლებამ სომხური წარმოშობის რუსი მილიარდერის, სამველ კარაპეტიანის, სახლში ჩხრეკა ჩაატარა მას შემდეგ, რაც მან სომხეთის სამოციქულო ეკლესიის დასაცავად განცხადებები გააკეთა საპატრიარქოსა და მთავრობას შორის არსებული დაძაბულობის ფონზე.

"თუ პოლიტიკოსები ვერ შეძლებენ, მაშინ ჩვენც ჩვენი გზით მივიღებთ მონაწილეობას ამ ყველაფერში" — განაცხადა კარაპეტიანმა სამშაბათს News.am-თან ინტერვიუში.

რამდენიმე საათის შემდეგ, ხელისუფლებამ ერევანში, მის სასახლეში ჩხრეკა ჩაატარა, საიდანაც პოლიციის თანხლებით წაიყვანეს კარაპეტიანი. მას ბრალი წაუყენეს "ხელისუფლების უზურპაციის, ტერიტორიული მთლიანობის დარღვევის ან კონსტიტუციური წესრიგის ძალადობრივი დამხობისკენ საჯარო მოწოდებაში". ბრალის დამტკიცების შემთხვევაში, მას ხუთ წლამდე თავისუფლების აღკვეთა ემუქრება. მისმა ერთ-ერთმა ადვოკატმა, არმენ ფეროიანმა, სისხლის სამართლის საქმეს "უკანონო" უწოდა და განაცხადა, რომ კარაპეტიანი თავს უდანაშაულოდ თვლის.

ცნობისთვის, სომხური წარმოშობის რუსი მილიარდერი "ტაშირის ჯგუფის" ხელმძღვანელია, რომელიც სომხეთის მთავარ ენერგოკომპანიას, "სომხეთის ელექტრო ქსელებს" (ENA) მართავს.

პრემიერმინისტრმა, ნიკოლ ფაშინიანმა სოციალურ ქსელში გამოაქვეყნა პოსტები, სადაც შეურაცხყოფა მიაყენა როგორც ეკლესიას, ასევე კარაპეტიანს და პირობა დადო, რომ "ისევ და სამუდამოდ გააუქმებდა მათ".

სამშაბათს, სომხეთის შინაგან საქმეთა სამინისტრომ CivilNet-ს განუცხადა, რომ "დააკავეს ადამიანთა ჯგუფი". ოთხშაბათს, კარაპეტიანის ერთ-ერთმა ადვოკატმა, რუბენ ჰაკობიანმა, განაცხადა, რომ კარაპეტიანის სახლთან 50-ზე მეტი ადამიანი დააკავეს და დადგენილ ვადაზე მეტხანს იმყოფებოდნენ პატიმრობაში.

ფაშინიანსა და ეკლესიას შორის დაძაბულობამ პიკს მიაღწია მას შემდეგ, რაც ფაშინიანმა მაისის ბოლოს განაცხადა, რომ ეკლესიები "საკუჭნაოდ" გადაიქცა და სასულიერო პირები ცელიბატის აღთქმას არღვევდნენ. ფაშინიანმა ასევე გარეგინ II შვილის ყოლაში დაადანაშაულა.

ფაშინიანი, მისი მეუღლე, ანა ჰაკობიანი და მისი "სამოქალაქო კონტრაქტის" პარტიის სხვა წევრები რეგულარულად ესხმიან თავს ეკლესიას და სასულიერო პირებს. ფაშინიანმა ინიციატივით გამოვიდა ახალი კათოლიკოსის ასარჩევად შეიქმნას საბჭო, რომლის ზოგიერთ წევრსაც ის პირადად დანიშნავს.

"არავის შეუძლია სომხეთის დაშინება"

ოთხშაბათს გამართულ პრესკონფერენციაზე ფაშინიანმა კარაპეტიანის გარშემო განვითარებული მოვლენების შესახებ კომენტარი გააკეთა და განაცხადა, რომ მაგნატის განცხადება ეკლესიას კი არა, სომხეთს ეხებოდა.

"მცდელობა იყო შეექმნათ შთაბეჭდილება, რომ ზოგიერთი ადამიანი ზოგიერთი ადგილიდან შეიძლება ჩამოვიდეს […] სომხეთში და, როგორც ამბობენ, რაღაც "თავისებურად" გააკეთოს", — თქვა ფაშინიანმა და დასძინა, რომ სომხეთს "კონკრეტული ბერკეტები აქვს რეაგირებისთვის".

როგორც მან აღნიშნა, სომხეთი დემოკრატიული ქვეყანაა. ფაშინიანმა დასძინა, რომ არავის "არ შეუძლია სომხეთის დაშინება, მე ასეთ შემთხვევაში ყველაზე მკაცრ ზომებს მივიღებ".

ოთხშაბათს, ფაშინიანმა ეროვნული უსაფრთხოების სამსახურის (NSS) დირექტორი არმენ აბაზიანი გაათავისუფლა. მედიასთან კომენტარის გაკეთებისას ფაშინიანმა განაცხადა, რომ აბაზიანი NSS-ის უფროსი ყველაზე ხანგრძლივი ვადით იყო.

"აბაზიანის მოღვაწეობა ძალიან რთული იყო და ვფიქრობ, რომ ის ცოტა დასვენებას იმსახურებს," — განაცხადა ფაშინიანმა.

მან ასევე დაადასტურა, რომ აბაზიანის გათავისუფლება კარაპეტიანის საქმეს უკავშირდებოდა და თქვა, რომ "საერთო ჯამში, ეროვნული უსაფრთხოების სამსახურის დირექტორის მუშაობა პრაქტიკულად ყველაფერს ეხება, განსაკუთრებით უსაფრთხოებასთან დაკავშირებულს და მათ შორის ჰიბრიდულ უსაფრთხოებას".

ფაშინიანმა უარყო ჭორები, რომ აბაზიანი მისი ბრძანებების შესრულებაზე უარის თქმის გამო გაათავისუფლეს.

სომხეთი კარაპეტიანის ბიზნესებს ამოწმებს და აჯარიმებს.

კარაპეტიანმა დაკავების დროს, სამშაბათს საღამოს კიდევ ერთხელ გამოხატა მხარდაჭერა ეკლესიის მიმართ და დასძინა, რომ მას "არ აინტერესებს ისინი ან მათი ელექტრო ქსელი".

პასუხად, ფაშინიანმა პირობა დადო, რომ "სწრაფად" მოახდენდა კარაპეტიანის ENA-ს ნაციონალიზაციას და ოთხშაბათს გამოაცხადა, რომ ამის შესახებ კანონპროექტი უკვე წარდგენილია პარლამენტში. თუმცა მან განაცხადა, რომ ეს ნაბიჯი არ იყო დაკავშირებული კარაპეტიანის მიერ ეკლესიის მხარდასაჭერად გაკეთებულ განცხადებებთან.

ფაშინიანმა განაცხადა, რომ ერთი თვის წინ მან თავისი კაბინეტის წევრებს დაავალა "მკაფიო მექანიზმების შემოღება [ელექტროენერგიის გათიშვის გამო] ხალხისთვის მიყენებული ზიანის კომპენსაციისთვის, წინააღმდეგ შემთხვევაში ENA-ს ნაციონალიზაცია უნდა მოხდეს". ოთხშაბათს მან განაცხადა, რომ მისი მითითებების შესრულების ბოლო ვადა 21 ივნისი იყო.

"მრავალი რეგიონული ვიზიტის დროს, გაკვირვებითა და გაბრაზებით აღვნიშნე, რომ სინამდვილეში, ENA-მ თავისი საქმიანობის შედეგად, თითქმის ენერგეტიკული კრიზისი შექმნა სომხეთში. ანალიზი იძლევა იმის საფუძველს, რომ ვიფიქროთ […] რომ ეს ყველაფერი გაკეთდა და კეთდება სომხეთში შიდა საზოგადოებრივი უკმაყოფილების გამოსაწვევად," — თქვა ფაშინიანმა.

მან ასევე აღნიშნა, რომ "ეკლესია ამ შემთხვევაში მხოლოდ კვამლია, რომელიც ENA-ს მალე უკვე ყოფილი მფლობელების დასაფარავად გამოიყენება"

იმავე დღეს, საზოგადოებრივი მომსახურების მარეგულირებელმა კომისიამ განაცხადა, რომ სომხეთმა ENA 10 მილიონი აშშ დოლარით (26,000 აშშ დოლარი) დააჯარიმა "ტექნიკური და კომერციული დარღვევებისთვის".

სურსათის უვნებლობის ინსპექტირების ორგანომ ასევე ჩაატარა ჩხრეკა კარაპეტიანის კუთვნილი პოპულარული პიცერიების ქსელის, "ტაშირ პიცის" 30-ვე ფილიალში, დახურა რამდენიმე ფილიალი "სანიტარული და ჰიგიენური სტანდარტების უხეში დარღვევისთვის"

რუსეთი "მკაცრად აკვირდება"

რუსეთის საგარეო საქმეთა სამინისტროს პრესსპიკერმა მარია ზახაროვამ რუსეთის სახელმწიფო საინფორმაციო სააგენტო RIA-ს განუცხადა, რომ ისინი "მკაცრად აკვირდებიან" სიტუაციას და დასძინა, რომ კარაპეტიანს "ერევანში უცნაური საბაბით თითქმის დაპატიმრებით ემუქრებიან".

ზახაროვამ ასევე განაცხადა, რომ ისინი მას "საჭირო დახმარებას გაუწევენ, რათა მისი ყველა კანონიერი უფლება დაცული იყოს".

კიდევ ერთი რუსული სახელმწიფო სააგენტოს, TASS-ის მიმართვის საპასუხოდ, რუსეთის საელჩომ ამ ეტაპზე თავი შეიკავა ამ ტემაზე კომენტარისგან.

სამშაბათს, რუსულ RT-სთან ინტერვიუში კარაპეტიანმა განაცხადა, რომ სომხეთის ხელისუფლებას "ნიღბებით შოუს დადგმა და მისი დაპატიმრება სურდა", მაგრამ ეზოში შეკრებილმა უბრალო ადამიანებმა წინააღმდეგობა გაუწიეს.

ჩხრეკის მიმდინარეობისას, კარაპეტიანის სასახლის მახლობლად შეიკრიბა ხალხის ჯგუფი, რომელთა შორის იყვნენ ოპოზიციონერი პარლამენტის წევრები. ოთხშაბათს, სომხეთის ხელისუფლებამ განაცხადა, რომ ENA-ს თანამშრომლები "ერევანში ხალხს კარაპეტიანის მხარდასაჭერად მიტინგში მონაწილეობისკენ უბიძგებენ".

ეკლესია "მკაცრად გმობს" კარაპეტიანის დევნას და მას "აშკარად პოლიტიკურად მოტივირებულს" უწოდებს. მან ასევე მოუწოდა ხელისუფლებას, "დაუყოვნებლივ შეწყვიტონ უკანონო ქმედებები". ოპოზიციურმა "სომხეთის ალიანსმა", რესპუბლიკურმა პარტიამ და სხვებმაც დაგმეს კარაპეტიანის წინააღმდეგ "რეპრესიები".

TASS-ის ცნობით, კარაპეტიანის ქონება "თითქმის სომხეთის სახელმწიფო ბიუჯეტის ნახევარს უტოლდება" და 3.2 მილიარდ დოლარს შეადგენს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.

ასევე იხილეთ:

ნიკოლ ფაშინიანის განცხადებით, სომხეთის ელექტროქსელები სახელმწიფოს საკუთრებაში გადავა