1980 წელს დღევანდელი რესპუბლიკის მოედანზე ისტორიული შენობა — თბილისის ცენტრალური ფოსტა და ტელეგრაფი გაიხსნა. პირველი დამოუკიდებელი საკომუნიკაციო ცენტრი, რომელმაც საქართველო და სხვადასხვა ქვეყნის ქალაქები ერთმანეთთან დააკავშირა.

ტელეგრაფი თბილისში იყო პროგრესის, ცოდნისა და ახალ ი ეპოქის სიმბოლო, საერთაშორისო გზავნილებისა და ინფორმაციის მიმოცვლის ადგილი. საბჭოთა მოდერნისტული არქიტექტურული ნაგებობა ბევრ ამბავსა თუ დიდ ისტორიას ინახავს, რომლებიც დღესაც გრძელდება.

უფუნქციოდ დარჩენილი შენობის რეკონსტრუქცია და ხუთვარსკვლავიან სასტუმროდ გარდაქმნა სილქ დეველოპმენტმა საქართველოს ბანკის მხარდაჭერით განახორციელა.

სასტუმრომ შეინარჩუნა არა მხოლოდ სახელი — ტელეგრაფი, არამედ არქიტექტურული ესთეტიკაც. კონცეფციაზე მსოფლიოში ერთ-ერთმა გამორჩეულმა სტუდია Neri&Hu-სიმ იმუშავა, რომელიც სწორედ ისტორიული შენობების რეკონსტრუქციით, წარსულისა და აწმყოს არქიტექტურული ბალანსით გამოირჩევა და ამ მიმართულებით მრავალი პრესტიჟული საერთაშორისო ჯილდოს მფლობელია.

ტელეგრაფის პირვანდელი არქიტექტურა ლადო ალექსი‑მესხიშვილსა და თეიმურაზ მიქაშავიძეს ეკუთვნით. ფასადი მოპირკეთებულია ბოლნისის ტუფით, რაც გამორჩეულ ვიზუალს ქმნის და მიესადაგება თბილისის ურბანულ ესთეტიკას. სასტუმროს განახლებულ დიზაინში კი, შენარჩუნებულია ძველი შენობის თითქმის ყველა ავთენტური დეტალი და განსაკუთრებულობა.

როგორც სილქ დეველოპმენტის აღმასრულებელი დირექტორი, მამუკა შურღაია ამბობს, შენობის იდეაზე Silk Road ჯგუფმა ბევრი იფიქრა და კონცეფციაზე მუშაობაც მხოლოდ მსოფლიოს წამყვან სპეციალისტებს ანდო:

“დიდი პასუხისმგებლობა იყო ჩვენთვის, როგორ გარდავქმნიდით შენობას, როგორ დავაკავშირებდით წარსულსა და აწმყოს ერთმანეთთან. Silk Road ჯგუფის მთავარი მიმართულება სტუმარ-მასპინძლობაა. გვსურს, რომ რეგიონში ამ სფეროს განვითარებაში დიდი წვლილი შევიტანოთ, სასტუმრო ტელეგრაფიც რესპუბლიკის მოედნის განვითარების დიდი სტრატეგიის ნაწილია. ჩვენი ყველა პროექტი მდგრადი, ეკოლოგიურად ჯანსაღი და ენერგოეფექტურია და მიმაჩნია, რომ ამ მიმართულებითაც დავიმკვიდრებთ სახელს.“

უნიკალურ ატმოსფეროში სასტუმრო 240-მდე ნომერს, განსხვავებული კონცეფციის შვიდ რესტორანს, ჯაზ კლუბებს, ბარებს, საბანკეტო-საკონფერენციო დარბაზსა და ურბანულ პეიზაჟებს აერთიანებს.

ტელეგრაფი პირველი სასტუმროა რეგიონში, რომელიც შეუერთდა საერთაშორისო ორგანიზაცია The Leading Hotels of The World-ს და მსოფლიოს განსაკუთრებულ სასტუმროებთან თანამშრომლობს. აქ მოსახვედრად მომსახურების უმაღლეს სტანდარტთან ერთად, აუცილებელია სასტუმროს ჰქონდეს კულტურული ღირებულება, ინდივიდუალური იდეა და იყოს ავთენტური. ეს კი ქვეყნის სტუმარ-მასპინძლობის ინდუსტრიაში უმაღლესი საერთაშორისო სტანდარტის დანერგვას გულისხმობს.

Silk Road ჯგუფმა მოახერხა და უმაღლესი ხარისხის მომსახურებასა და სერვისებთან ერთად შექმნა ისტორია, ადგილი, რომელსაც ბევრი ამბავია მოსაყოლი. სივრცე, საიდანაც დაიწყო ურთიერთობები, დღესაც დააკავშირებს ადამიანებს მსოფლიოს სხვადასხვა ქვეყნიდან.

საქართველოს ბანკისთვის სტუმარ-მასპინძლობის სექტორის მხარდაჭერა და ტურიზმის განვითარების ხელშეწყობა წლებია უცვლელი პრიორიტეტია. კომპანია მომავალშიც აქტიურ რეჟიმში განაგრძობს პარტნიორ ბიზნესებთან ერთად საინტერესო და ქვეყნისთვის მნიშვნელოვანი პროექტების განხორციელებას.