"არ ვიცი, რა შუაშია კახა კალაძე? "თბილსერვისში" კი ბატონო. რაც შეეხება გამოძიებას, გამოძიება უკავშირდება ეკონომიკის სამინისტროში კონკრეტული პირის საქმიანობას. რაც შეეხება დავითაშვილს, მის კეთილსინდისიერებაში არავის ეპარება ეჭვი", — განაცხადა ოცნების პრემიერმა ირაკლი კობახიძემ ჟურნალისტები კითხვაზე — გამოიკითხა თუ არა ეკონომიკის მინისტრის ყოფილი მოადგილის, რომეო მიქაუტაძის დაკავების საქმეზე ვიცე-პრემიერი ლევან დავითაშვილი და პარტიის გენერალური მდივანი კახა კალაძე, რომლებიც სხვადასხვა დროს მისი ხელმძღვანელები იყვნენ.

მისი თქმით, ოცნების ხელისუფლებისთვის "კორუფციასთან ბრძოლა ერთ-ერთ უმთავრეს პრიორიტეტად რჩება" და "ამბიციური მიზანი' აქვთ, რომ საქართველო "ევროპის სამეულში შევიდეს კორუფციის სიმცირის თვალსაზრისით".

"მე ვერ შევალ კონკრეტული საქმის დეტალებში. ეს არის სამართალდამცავი ორგანოების კომპეტენცია. დაველოდოთ გამოძიების შედეგებს. ზოგადად, კორუფციასთან ბრძოლა რჩება ჩვენს ერთ-ერთ უმთავრეს პრიორიტეტად, ამბიციური მიზანი გვაქვს გაცხადებული, გვინდა ევროპის სამეულში შევიდეთ კორუფციის სიმცირის თვალსაზრისით. ამ კუთხით, ძალიან ბევრი ცვლილება განხორციელდა მთავრობაში, ხელისუფლებაში. ყველაფერი გაკეთდება, რომ მაქსიმალურად ვებრძოლოთ კორუფციას. კორუფცია აფერხებს ქვეყნის განვითარებას. ეს უნდა დარჩეს უმთავრეს პრიორიტეტად", — აღნიშნა პრემიერმა.

ანტიკორუფციულმა სააგენტომ ეკონომიკისა და მდგრადი განვითარების მინისტრის ყოფილი მოადგილე 21 ივნისს დააკავა. პროკურატურის ცნობით, რომეო მიქაუტაძემ მასთან დანაშაულებრივ კავშირში მყოფი პირების დახმარებით განსაკუთრებით დიდი ოდენობით შემოსავლის – 2 556 192 ლარის უკანონო დაუსაბუთებელი ლეგალიზაცია მოახდინა.