"საქართველოს მომავლის აკადემიის" განცხადებით, რაჟდენ კუპრაშვილის ბიურო ორგანიზაციისგან არასრულწლოვნების სახელებსა და გვარებს, პირად ნომრებს, ფოტო-ვიდეო მასალას და სხვა პირად ინფორმაციასაც ითხოვს.

როგორც "მომავლის აკადემიის" განცხადებაშია აღნიშნული, ორგანიზაცია "არც აქამდე ემორჩილებოდა რუსულ კანონებს და არც სამომავლოდ აპირებს ივანიშვილის რეჟიმის მიერ შექმნილ რეპრესიულ გარემოსთან შეგუებას"

"ივანიშვილის რეჟიმმა რეპრესიის მორიგი ტალღა წამოიწყო, რომლის ერთ-ერთი სამიზნე ოთხ ქართულ არასამთავრობო ორგანიზაციასთან ერთად საქართველოს მომავლის აკადემია გახდა.

რეჟიმისადმი დაქვემდებარებული რაჟდენ კუპრაშვილის ბიურო პუტინის რუსეთის სტილში ჩვენგან ითხოვს ორგანიზაციის საქმიანობასთან დაკავშირებული აბსოლუტურად ყველა სახის ინფორმაციის მათთვის გადაცემას, მათ შორის ჩვენი პროექტების ათასობით მონაწილის: არასრულწლოვანი სკოლის მოსწავლეების, სტუდენტების, ახალგაზრდა პროფესიონალებისა და საარჩევნო დამკვირვებლების სახელებსა და გვარებს, პირად ნომრებს, ფოტო-ვიდეო მასალას და სხვა პირად ინფორმაციას.

ჩვენთვის აშკარაა, რომ რეჟიმის მორიგი რეპრესიული ქმედება მიმართულია თავისუფალი ადამიანების და ორგანიზაციების წინააღმდეგ, რომელთაც სურთ თავისუფალ და დემოკრატიულ საქართველოში ცხოვრება.

საქართველოს მომავლის აკადემია არც აქამდე ემორჩილებოდა რუსულ კანონებსა და არც სამომავლოდ აპირებს ივანიშვილის რეჟიმის მიერ შექმნილ რეპრესიულ გარემოსთან შეგუებას. ჩვენთვის კატეგორიულად მიუღებელია რეჟიმთან ნებისმიერი თანამშრომლობა, მათ შორის მათთვის რაიმე ტიპის ორგანიზაციული და პირადი მონაცემების გადაცემა. ჩვენ გამოვიყენებთ ყველა სამართლებრივ გზას ჩვენი ბენეფიციართა უფლებების და საქართველოს ევროპული მომავლის დასაცავად" — წერია განცხადებაში.

შეგახსენებთ, რომ არასამთავრობო ორგანიზაციებმა გუშინ ბრიფინგი გამართეს და განაცხადეს, რომ 17 ივნისს ანტიკორუფციულმა ბიურომ რუსული კანონების აღსრულება დაიწყო და სამართლებრივი საფუძვლის გარეშე მათი დაცვის ქვეშ მყოფი მოქალაქეების პერსონალური ინფორმაციის გადაცემა მოსთხოვეს. მესამე სექტორის წარმომადგენლების განცხადებას ანტიკორუფციული ბიუროს ხელმძღვანელი, რაჟდენ კუპრაშვილი გამოეხმაურა და სიცრუე უწოდა. კუპრაშვილის ბრიფინგის შემდეგ "საფარის" ხელმძღვანელმა ბაია პატარაიამ სოციალურ ქსელში ანტიკორუფციული ბიუროს მიერ გამოგზავნილი დოკუმენტი გამოაქვეყნა, სადაც წერია, რომ ბიურო არასამთავრობო ორგანიზაციას ბენეფიციარებზე დეტალურ ინფორმაციას სთხოვს, მათ შორის ფოტო-ვიდეო მასალას.

ასევე იხილეთ:

• NGO-ები აცხადებენ, რომ ანტიკორუფციული ბიურო მათი დაცვის ქვეშ მყოფი მოქალაქეების პერსონალურ ინფორმაციას სთხოვს
• რაჟდენ კუპრაშვილი: ვრცელდება არასწორი ინფორმაცია, თითქოს ბიურო ორგანიზაციებისგან მოქალაქეთა პირადი დოკუმენტაციას ითხოვს
• "რაჟდენა ცრუობს, როცა ამბობს, რომ ბენეფიციარებზე ინფორმაცია არ მოუთხოვია "საფარისთვის" — ბაია პატარაია რაჟდენ კუპრაშვილზე
• რაჟდენ კუპრაშვილი: "თუ რომელიმე სუბიექტი გადაწყვეტს, რომ კანონი [FARA] არ აღასრულოს, რა თქმა უნდა ვიმოქმედებთ კანონის შესაბამისად"
• ბაია პატარაია: "საფარის" არქივის უდიდესი ნაწილი უკვე განადგურებულია, რომ ხელში არავის ჩაუვარდეს ეს სენსიტიური ინფორმაცია
• სალომე ზურაბიშვილი: "იმის ნაცვლად, რომ კორუფციის არაერთ გახმაურებულ საქმეზე დაიწყოს გამოძიება, კუპრაშვილის უწყება სადამსჯელო უწყებად იქცა"
• საბა ბრაჭველი: ითხოვენ, რომ ჩვენი მოქალაქეების ნდობას ვუღალატოთ და მათ ჯანმრთელობაზე ინფორმაცია მათივე მჩაგვრელებს გადავცეთ