ისრაელის პრემიერმინისტრის, ბენიამინ ნეთანიაჰუს განცხადებით, ირანს მისი და ამერიკის შეერთებული შტატების პრეზიდენტის, დონალდ ტრამპის მკვლელობა სურდა. ამის შესახებ ნეთანიაჰუმ Fox News-თან ინტერვიუში ისაუბრა.

"მათ მისი მოკვლა სურთ. ის ნომერ პირველი მტერია. ტრამპი გადამწყვეტი ლიდერია. ის არასდროს ირჩევდა იმ გზას, რომელიც სხვებმა აირჩიეს — სუსტი მეთოდით მოლაპარაკება მათთან, რაც მისცემდა მათ ურანის გამდიდრების საშუალებას.

მან აიღო ეს ყალბი შეთანხმება და ფაქტობრივად დახია. მან მოკლა ყასემ სოლეიმანი. მან ძალიან ნათლად განაცხადა, მათ შორის ახლაც: "თქვენ არ შეგიძლიათ გქონდეთ ბირთვული იარაღი, რაც ნიშნავს, რომ არ შეგიძლიათ ურანის გამდიდრება". ის ძალიან მკაცრი იყო, ამიტომ მათთვის ის ნომერ პირველი მტერია," — განაცხადა ნეთანიაჰუმ.

ნეთანიაჰუს თქმით, ისიც რეჟიმის სამიზნე გახდა მას შემდეგ, რაც მისი სახლის საძინებლის ფანჯარაში რაკეტა ისროლეს. მან თავი ტრამპის "უმცროს პარტნიორად" მოიხსენია ირანის ბირთვული იარაღის გამოყენების მუქარაში.

ნეთანიაჰუმ განაცხადა, რომ მისი ქვეყანა ბირთვული განადგურების "გარდაუვალი საფრთხის" წინაშე დგას და მას სხვა გზა არ დარჩა, გარდა იმისა, რომ აგრესიულად იმოქმედოს.

"ჩვენ გარდაუვალი საფრთხის წინაშე ვდგავართ, ორმაგი ეგზისტენციალური საფრთხის", — თქვა მან.

დონალდ ტრამპზე გასულ წელს ორჯერ მოხდა თავდასხმა — პირველად 13 ივლისს პენსილვანიის შტატში, ხოლო მეორედ 15 სექტემბერს ფლორიდაში. წინასაარჩევნო კამპანიის დროს ტრამპის მკვლელობის მცდელობისთვის აშშ-ის იუსტიციის დეპარტამენტმა ირანის მოქალაქეს და კიდევ ორ პირს ბრალი წაუყენა.